Manchester Bomb Puak
Ariana-i’n US a thleng tawh
A concert-naah bomb a puak a, mi 22 lai an thih phah hnuah Thawhlehni khan Ariana Grande hi US-ah haw thlain, Florida-a Boca Raton-ah a ṭum. A lo hmutute chuan a lungchhiain, rilru tawt hmel takin a awm niin an sawi a, a concert-naa thil thleng khan nasa takin amah a nghawng a, hlauhthawnna lian tak a la nei niin a lang. Boca Raton-ah hian a chhungte leh a bialpa ten an lo hmuak. A manager Scooter Braun chuan, “Awmze nei lo pawikhawihna avanga thi leh hliam tuarte tana kan lungngaihna hi thu maia sawi chhuah thiam chi a ni lo,” a ti. He chhiatna avang hian Ariana Grande hian a tour neih tur hmabak eng emaw zat pawh a suspend nghal.
Ariana bialpa, Mac Miller chuan a bialnu avang hian a tour neih turte pawh cancel ve a duh nia sawi a ni. Mac Miller hian a bialnu hi a him a, a rilru pawh a pangngai ta tih a nih hma loh chuan concert tour-a chhuah rih loh a duh nia sawi a ni. Ariana-i’n ngai a awh hunah concert lam chu a ngaihtuah leh chauh mai thei niin an tarlang bawk.
Nicki Minaj-i’n Manchester lam a hawi thung
Ariana concert-naa bomb puak avang hian Nicki Minaj chuan Manchester khawpui lam a hawi ngut thung mai. Manchester-a music fan-te tan liau liau Nicki Minaj chuan nakkum khian Manchester-ah concert neih a tum.
Minaj chuan, “Manchester-a ka fan-te tan ka perform dawn a ni mai, an phu a ni,” a ti. Ariana Grande a khawngaih a, “Ariana hi ka laizawn a ni a, ka hmangaih a ni. UK mipuite hi ka ngaina a, kha chanchin khan min ṭhâwng hle. Thinlung nghawr dawt thil a ni,” a ti.
Take That-in an concert tur an cancel
British pop band lar Take That chuan Manchester-a show an neih tur chu an ṭhulh tih an puang. Take That hi tun Thawhṭanni lo awm tur zan hian bomb puahna hmun, Manchester Arena-a concert tur an ni.
Take That bakah hian he arena-a tunkara concert turte tan chuan concert theih a ni dawn lo a, Manchester Arena enkawltuten an khar rih. Manchester Arena enkawltute chuan, “Manchester-a chhiatna rapthlak tak a thlen avang leh, police-ten hnu an chhui zui avangin Ningani, Zirtawpni leh Inrinni-a concert neih turte chu ṭhulh a ni a, hun dang remchanga neih tur a ni ang. A theih anga rangin kimchang zawka thu tihchhuah leh a ni ang,” an ti. Take That-ah hian Gary Barlow, Howard Donald leh Mark Owen te an tel a, tun ṭum hian Robbie Williams erawh an zingah a tel lo.