SISTAR group chu tihtawp a ni ta

K-Pop lamah a ṭhenin khawvel hriat an hlawh mek laiin a sulsutu pawimawh ṭhenkhatte an chawl ṭan thung. Girl group zinga hlawhtling hmasa leh hriat hlawh hmasa, SISTAR pawhin group anga music an chawlhsan tak thu an puang chhuak.

Kum sarih zet mai K-pop music khawvela hmeichhe group hlawhtling ni ṭhin SISTAR chuan music an chawlhsan ta. An agency, Starship Entertainment chuan music an chawlhsan thu hi rawn nemnghatin a rawn puang chiang. Music khawvel an thlahna tur hian May 31-ah album an tichhuak leh ang a, chu chu an group anga an hnu hma hnuhnung tur a ni tawh ang.

Hyorin, Bora, Soyou leh Dasom te chuan SISTAR group chu nuam an tih thu an tarlang hlawm a, an group tihtawp a nih tak thu chu pawm thiam a har lek lek niin an sawi. A hrangin kal dawn tawh mah se, an inthlawp tlat zel dawn a, ṭhian ṭha tak an ni chhunzawm zel dawn tih an puang bawk.

SISTAR hi kum 2010 khan Starship Entertainment hian a siam a ni a, kum 2011 khan an album hmasa ber, So Cool chu an tichhuak. Kum 2013 khan an album pahnihna, Give it to me an tichhuak leh a, Billboard Korea K-Pop Hot 100 single-ah pawh pakhatna an lo luah tawh. K-Pop girl group-a hlawhtling ber leh hriat hlawh berte zinga mi an ni.