Val Kilmer Tawngtaina avanga damah a inngai

Actor lar leh hlawhtling Val Kilmer hian cancer natna a nei ṭhin a, tunah chuan a dam ta. A damna chhan ber nia a hriat chu ṭawng-ṭaina vang a ni.

A hun hmasa lam chu eng pawh ni se, tunah hian Val Kilmer hi Kristian ṭha tak a ni. Kum 57 mi actor hian a hmain natna a nei tih a sawi chhuak duh lo a, a hriselna lam an zawh pawhin cancer chungchang hi a sawi chhuak ngai lo. Tunhnaiah chauh a sawi chhuak a, cancer natna aṭanga a dam leh chhan pawh Kristian a nih avang leh, ṭawngṭaina avang liau liau a ni a ti.

Val Kilmer hi a fan pakhat chuan Reddit.com-ah zawhna a zawt a, chutah chuan, “Khawvel hmun hrang hrang aṭanga ṭawng-ṭaina leh rilru ṭha avangin ka lawm hle. Christian scientist ka ni tih hretu ṭhenkhat chuan keimah leh keimah ka intiderthawng niin an ngai ṭhin. Nimahsela hun kal tawhah te pawh mi sang tam tak hi ṭawng-ṭaina avangin an dam tih chhin­chhiah a ni. Mi sang tam tak dang hi tunlai damdawi thiamna hmanga enkawl an ni chung­in an thi tho a ni,” a ti. Hetaṭanga a landanin Val Kilmer hiṭawngṭai thiltihtheihna ring tlattu a ni a, eng natna pawh hi ṭawng-ṭaina hmangin a dam thei tih a ring. Ṭawngṭainaa dam thei nia a inngaih avangin mi tam tak chuan dinhmun hlauhawmah a indah niin an ngai a, an ngaih ang a ni lo a, ṭawngṭaina hian thil a ti thei a ni tiin a sawi chhuak a ni. Val Kilmer leh Tom Cruise channa hlawhtling, Top Gun kha a chhunzawmna tur siam tuma hma lak mek a ni. Top Gun kha kum 1986-a tihchhuah kha a ni a, a hunlaia film hlawhtling a ni. Nikum khan Top Gun chhunzawmna tur siam a nih tur thu hi producer Jerry Bruckheimer chuan a sawi chhuak tawh a, Val Kilmer hian Instagram aṭangin tun hnaiah a rawn puang chiang leh a ni.

Top Gun film-a Tom Cruise chanpui hian cancer natna a nei tih sawi chhuaktu hmasa chu Michael Douglas a ni. Michael Douglas hi kum 2013 khan cancer natna a nei tih hmuhchhuah a ni a, a hnu lawkah Val Kilmer pawhin a natna ang a nei tih a sawi chhuak. “Val hi mi danglam tak a ni a, ka neih ang nei a ni a, a tan thil a ṭha vak lo hle,” a ti.