Hamlet drama changtute kâwm

Audio cassette hunlaia drama cassette lar, tun thlenga mi tam takin an la ngaihthlak fo, Hamlet ngei mai kha, khata aw thawhtu, a changtute chu nizan khan Ignite Studio-ah ZONET Cable TV chuan a kâwm.

Hamlet drama changtute kawmna hi ZONET Cable TV-a Zoram Kal­siam programme enkawltute buatsaih a ni a, Mizoram University-a Mizo Deptt zirlai, Govt Johnson College zirlaite leh thu leh hla lama mi thiam ṭhalai rualte bakah chanchinbua ṭhalaite huang ziaktuṭhenkhat an tel.

Hamlet lemchan thawnthu hi Shakespeare-a ziak a ni a, Mizo ṭawng­in JF Laldailovan a let­ling. Thu leh hla thiam leh lar Mafaa Hauhnar chuan, “Redemption Thea­tricals-ina Mizo

ṭawng­a Hamlet leh Romeo & Juliet drama, audio cassette-a an siam kha a hu zah a na ngang mai, Mizo zawng zawng tih mai tur kha William Shakespeare leh JF Laldailova thu leh hla khawvelah min lên lût delh delh. Elsinore te min fanpuiin, Verona kawt­thlerah te min tualchaitir a. A hun laia keini ang rual kha chuan an drama kha kan vawng (by heart) fur âwm asin. An aw mawi tak hmangin Mizo ṭawng lo mawi theihzia chiang takin min hmuhtir a. Thu leh hla tuifinriata thûk zawka ka liluhna tura min nawrtu pakhat an ni a, an lakah bat ka nei,” a ti.