Manchester Bomb Puak

Ariana Grande concert cancel hun chhung a chiang

Manchester khawpuia a concert-naa bomb a puah avang khan Ariana Grande hian tour a neih mek chu a cancel tih a sawi chhuah hnu lawkah a cancel hun chhung pawh a sawi chiang ve ta nghal.

Ariana Grande hian Dangerous Woman tour-in Manchester khawpuiah concert a nei a nih kha. Chhiatna rap­thlak tak a thlen tak siah chuan Europe-a a tour neih tur hmabak chu June 5 thlenga a lo ruahman tawh chin chu a cancel ta vek. A hmaa ruahmanna a lo siam dan chuan May 25 leh 26-ah London-a O2 Arena-ah, May 28 hian Belgium-ah, June 3-ah Germany leh June 5-ah Switzerland-a concert te a tum a, hengte hi a cancel ta vek a ni.

Harry Styles concert-ah Manchester hriatrengna

Ariana Grande concert-a bomb puaka thite pualin Harry Styles chuan a concert-ah hun a hmang. Harry Styles hian Mexico-ah concert a nei a, a concert-ah hian Manchester-a bomb puak vanga thite sûnna hun hmangin, ngawi rengin hun eng emaw chen an awm. Harry Styles chuan, “Ka chhuahna khua Manchester-ah chhiatna rapthlak tak a thleng a, thinlung lungngai takin ka awm. Manchester Arena hi show ka neih hmasakna ber a ni a, Manchester-ah hian tawnhriat ropui ber ber ka nei a ni,” a ti.

Bieber-a a fan ten an nawr

Justin Bieber hian UK-ah concert nei turin a hma aṭang tawhin ruahmanna a siam a, Manchester khawpuia chhiatna a thlen hnuah a fan-te chuan Justin Bieber hi concert a neih tura a ruahmanna te cancel turin an nawr.

Bieber-a’n ruahmanna a lo siam tawhah chuan June 30 khian Cardiff-ah a concert ang a, July 2-ah London-ah a concert ang. Fan-te chuan amah Bieber him zawk nan concert tura ruahmanna a lo siam tawh chu ṭhulh turin an duh a ni. Fan ṭhenkhat chuan khatiang chhiat­na ang kha a chunga thlen an phal loh avangin a concert turte ṭhulh mai turin an ngen.