Hmeichhe James Bond siam a ngai lo - Ana de Armas

'No Time to Die' tlangzarh a ni chiah kha chu, kha film tihmuhnawmtu ber zinga mi pakhat chu Ana de Armas a ni, tih kha mi tam ber pawm dan a ni. A lan chhung rei lo mahse sawizui a hlawh. Mahse, Ana de Armas chuan hmeichhe James Bond siam ṭulin a hre lo tlat!

The Sun hnenah hemi chungchang hi sawiin,"Hmeichhe James Bond siam a ngai lo. Tu emaw character ruk a ṭulna awmin ka hre lo," tiin a sawi.

"Ka duhdanah chuan Bond film-ah hian hmeichhe role, Bond tak chu mipa ni thoin, hmeichhe role danglam takin rawn siam se ka ti," tiin a sawi bawk.

Ana de Armas hian hemi chungchangah hian Daniel Craig ngaihdan pawh a ṭawm a tih theih awm e. Craig pawhin Radio Times hnenah nikum lamah khan hemi chungchanga zawhna chu lo chhang tawhin,"Ka chhanna chu mawlmang tak a ni. Hmeichhe lemchan thiam vun rawng dang neite role pawimawh zawk pe mai se. James Bond ang chiaha part ṭha an chang theih reng laiin engvangin nge hmeichhiaiin James Bond lem an chan a ṭul kher ang?" tiin a lo sawi tawh.

Daniel Craig-a'n James Bond lem a chang tawh dawn lo tih tihchian a nih hnu khan mi eng emaw zat chuan hmeichhe James Bond chungchang hi an sawi ri tawh a, ṭhenkhat chuan James Bond hmeichhia kan hmuh ngei pawh an ring hial a ni.

He film franchise producer rei tak chhung lo ni tawh Barbara Broccoli pawhin Bond character chu mipa a nih thu leh mipa ngei nih chhunzawm zel se a duh thu The Guardian hnenah a lo sawi ve tawh bawk.

007 thar turah hian hun eng emaw chen aṭang khan inhnialna awm tawhin ṭhenkhat chuan hmeichhe James Bond kan hmuh an ring a, ṭhenkhat erawh chuan mihang James Bond kan hmu dawn niin an sawi thawi tawh bawk. Mahse hemi chungchangah hian film siamtu lam chuan engmah an la tichiang lo.