Bethsy Lalrinsangi 'Isua nen chuan' a mawi ber - ṬHAZUAL FAKNA

Ṭhazual Fakna chart-ah Bethsy Lalrinsangi 'Isua nen chuan' chu No.1-ah a rawn invawrh a,  Mawitea 'Chibai ka buk che' chu pahnihna niin Lalthlengliani Jongte 'A hming fak la' chu pathumna a ni bawk.

'Min hmangaih si a' thiam taka satu Bethsy Lalrinsangi hla mawi tak 'Isua nen chuan' hi March thla tir lama a tihchhuah kha a ni a, thla thum pawh a ral hmain Ṭhazual Fakna chart-ah No.1 a ni tawh.

Music video pawh a hmuh­nawm a, model-ah pawh Miss Mizoram 2017 Rody H Vanlal­hriatpuii ngat a hmang a, YouTube-ah pawh mi nuai riat dawnin an thlirin an ngaithla tawh a ni.

He hla hi a satuin a sak thiam piah lamah a hla thu a ṭhain a hla thluk a mawi bawk a, chart-a No.1 a ni thei pawh hi a mak lo hle. 

'Isua nen chuan' hi chart hmasa lamah khan parukna a ni a, tunah erawh pakhatna a rawn ni der a, ngaihthlak leh thlan a hlawh tih a hriat a, nek chhuah pawh a huphurhawm hle ang. Tunhnaia fakna hla tihchhuahah chuan ngaihthlak hlawh ber zinga mi a ni tih a chiang a, chart-a pakhatna dinhmun hauh nawn thei hi tunhnaiah an tam lo hle a, Bethsy pawh hian a dinhmun hi a hum thei angem tih hriat a chakawm tawh hle a ni.

Mawitea 'Chibai ka buk che' chu pahnihnaah a awm leh a, chart hmasa lama a dinhmun ngaiah a awm nawn leh a ni. 

Lalthlengliani Jongte chuan hma a sawn zel thung a, chart hmasa aiin a dinhmun a sawh nghet hret a, a hla 'A hming fak la' chu pathumna a rawn nihpui tawh a, hma a sawn zel pawh a rinawm.

Hmingtea Chhangte pawhin 'Hun duhawm' chu hmasawn pui zelin pasarihna aṭangin palinaah a rawn invawrhpui a, Seraphic Choir hla 'Hnehna Lallukhum' chu pariatna aṭangin panganaah an rawn insawn bawk a ni.

Ṭhazual fakna chart-ah hian zaithiam lar tak tak top 10-a lang an awm nual a, chung zingah chuan Pensy, One In Christ leh Fiona Lalmalsawmite pawh an tel.

1    Bethsy Lalrinsangi     - Isua nen chuan

2    Mawitea    - Chibai ka buk che

3    Lalthlengliani Jongte    - A hming fak la

4    Hmingtea Chhangte    - Hun duhawm

5    Seraphic Choir    - Hnehna Lallukhum

6    Pensy    - Ka tan Krawsah ngei chuan

7    One In Christ    - Zing Daifim

8    Mapuii    - Zirtirtu ṭha

9    Fiona Lalmalsawmi    - Kristaa lawmna

10    Lalbiaktluanga (Btea)    - Fak tlak I ni