Liam Payne pawh pakhatnaah a rawn lang

One Direction member zinga solo-a pakhatna luah thei palina ni turin Liam Payne chu Billboard + Twitter Top Tracks-ah pakhatna a rawn luah.

Liam Payne hian Quavo nena an sak ‘Strip That Down’ hmangin Billboard + Twitter Top Tracks chart-ah pakhatna a rawn luah a, One Direction member, solo-a an kal hnua chart hrim hrima pakhatna luah thei palina a ni. Zayn chuan pakhatna a luah hmasa ber a, chumi hnuah Niall Horan a rawn lang leh a, Harry Styles a rawn lan leh hnuah Liam Payne hi a rawn lang ve leh ta a ni.

Billboard + Twitter Top Tracks chart hi Billboard album hnuaia mi a ni a, kar tin tihchhuah a ni ṭhin. US-a Twitter-a hla an share nasat leh an mention nasat ber aṭanga thlan chhuah a ni a, Liam Payne-a hla ‘Strip That Down’ hi an share leh mention nasat ber hla tihna a ni.

‘Strip That Down’ hla hi May 19 khan lyric video tihchhuah ṭan a ni a, he hla a tihchhuah aṭangin khawvel pumah viewer pawh maktaduai 5 chuang a nei tawh.

Korean lam an langsar tial tial a, K-Pop group, TWICE pawh Billboard + Twitter Top Tracks chart-ah an rawn lang. TWICE hla ‘Signal’ chu palinaah an rawn lang thar a, Top Tracks chart-a an lan vawi hnihna a nih bakah, an la thlen san ber ṭum a ni.