Adele leh Drake-te tluk loh David Bowie

Kum 2016 khan a thi tawh a, chuti chung chuan David Bowie hi Britain-ah chuan zaithiam dangten an tluk lo. Adele hi British mi niin, khawvela hmeichhe zaithiam hlawhtling berte zinga mi ni mah se David Bowie hi a tluk lo.

British Phonographic Industry (BPI)-in a tarlan dan chuan nikum chhung khan Britain-ah chuan Adele te, Drake te, Ed Sheeran te aiin David Bowie-a album-te chu an hralh hnem zawk. Thla 12 chhungin album hralh (album equivalent-te nena chhutin) hnem lamah tuman David Bowie hi an tluk lo a ni.

David Bowie-a’n album a lo tihchhuah tawhte chu an hralh tam lamah emaw, stream nasat lamah zai­thiam dangten an pha lo a, thla 12 chhunga streaming equivalent te nena an hralh zat hi maktaduai 1.6 zet a tling. A thihnain nghawng a nei lian hle tih a lang a, mi tam takin an lo la ngaihsanzia a lang chiang bawk.

Adele chu album hralh hnem lamah pahnihna a ni. Album a lo tihchhuah tawh ho pathumte kha nikum chhung khan UK-ah hian maktaduai 1.2 a hralh a, Drake-a album-ho pawh maktaduai 1.09 an hralh.