Pirates film pangate siam nana senso USD tld 1.274
Pirates of the Caribbean film hi film, chhunzawmna awm zel chi zinga budget sang ber a ni hrim hrim a, he film zinga pakhat siamna ringawt pawh hi khawvela film siamna senso sang ber a ni a, chu chu kum 2011-a tihchhuah On Stranger Tides kha a ni a, USD mtd 378.5 zet senga siam a ni. Pirates film-ho zinga siamna senso tlem ber chu a hmasa ber, The Curse of the Black Pearl kha a ni a, USD mtd 140 an seng.
India hian Mars zir-chiang tura thla lem kahchhuah nana a insen zawng zawng kha USD mtd 73 chauh a ni. Pirates of the Caribbean film pakhat siamna senso hmang hian India chuan Mars mission vawi hnih a nei thei a, Pirates film-ho zawng zawng siam nana an senso, USD tld 1.274 hmang phei chuan Mars-ah khian a inkap chho awn awn thei dawn a ni.
Tuna a hnunhnung ber, Dead Men Tell No Tales film budget bik hi USD mtd 230 a ni a, kar liam ta chhung khan North America aṭangin USD mtd 62.2 a lalut a, khawvel ram danga a sum lakluh zawng zawngte nen USD mtd 270 a tlin a, a hlawhtling hle. Chawlh-kar khat chhungin film budget a khum nghal tihna a ni.
Pirates film-ho zing-a sum lalut hnem ber chu Dead Man’s Chest kha a ni. USD mtd 225 budget-a neiin, North America aṭang chauh pawhin $423,315,812 a lalut a, ram dang aṭangin $642,863,913 lalutin, a sum lakluh zawng zawng chu $1,066,179,725 zet a ni.