Diesel khu avangin thi an tam

Zirchianna an tih­chhuah tharah chuan diesel engine motor-in khu an tihchhuah avanga an thih tur aia hmaa thih phah hi khawvel pumah kum 2015 chhung khan mi 38,000 an tling.

Motor siamtu tam tak hian diesel hmang motor an siamin, nitorgen oxide an tihchhuah zat an tarlang ṭhin a, amaherawhchu diesel motor-te an han tlan tak takah hi chuan NOx hi motor siam­tutena an sawi aia tam fe an tichhuak a ni. International Council on Clean Transportation-in a tarlan dan chuan NOx avanga thihna thleng hmun ngaa ṭhen hmun hnihte hi European Union, China leh India-a mite an ni a ti.

Journal pakhat, Nature-a zirchianna hi tihchhuahah chuan Volkswagen leh motor siamtu dang­te chuan diesel engine hmang an tihchhuahte hi laboratory aṭanga an test a, NOx an tihchhuah zat an tarlante aiin, a tak takah chuan heng motor-te hian NOx hi an tichhuak tam zawk hle. Ram 11-a diesel motor-tena khu an tihchhuah dan an tarlanah chuan a siamtuten NOx an ti­chhuak nia an sawi aiin a takah chuan zaa 50 aia tamin an tichhuak thung. Hetiang boruak bawlhhlawh avang hian kum 2015 chhung khan mi 38,000 ten an thih phah.

Khawvelin NOx a tihchhuah zawng zawng zinga za 90 te hi Brazil, China, EU, India leh United States-tena an pek chhuah a ni. Nitrogen Oxide hi boruak chhia, hlauh­awm tak a ni. Acid rain thlentute zinga boruak pakhat a ni a, ammonia nena a inzawm hlauh phei chuan chuapah a lut thla a, chuap cancer a thlen thei a, thâwkna lamah harsatna a thlen a, an dam hun tura sei an dam thlen loh phah.

A hmaa zirchianna awm tawhah, kum 2008 aṭanga 2015 chhung khan Volkswagen ringawt hian Germany-ah an car maktaduai 2.6 an hralh. Heng car tena boruak chhia a tihchhuah avang ringawt hian Europe-ah mi 1,200 chuan an dam tur aia tawi an dam phah a ni.