Deep Purple-in Steve Morse an thlah a ngai ta

Deep Purple guitarist Steve Morse chuan a nupui Janine cancer vanga damlo enkawl a duh vangin band a chhuahsan thu a sawi.

Steve Morse hian March thla khan live concert lamah chuan inlan rih a tum tawh lo thu a lo sawi tawh a, mahse band a chhuahsan thu erawh khatih lai khan a la sawi lo. Tour an neihnaah chuan Simon McBride chuan a ai a awh ṭhin a ni. Mahse Inrinni khan thuchhuah siamin band zawm a tum tawh loh thu a sawi ta thung.

"Rock Legends Cruise (February) Florida-ah khan Purple tana ka show hnunhnung berah ka inlan tawh a ni.

"Min ngaithla ṭhintu, live music thlawp tlat ṭhintu, rehearsal kan neih experience ṭha taka chantir ṭhintute chungah lawmthu ka sawi duh a ni. Band leh crew-a mi zawng zawngte hi ka ngai dawn hle a, mahse Janine ṭanpuitu leh advocate ka nihna hian kawng pawimawh tak takah danglamna a thlen tlat si a ni," tiin Morse chuan a sawi.

Deep Purple singer Ian Gillan pawhin Steve Morse a ui dawn thu sawiin,"Steve hian Deep Purple nen hian legacy theihnghilh theih tawh loh tur a hnutchhiah a ni," tiin an ngai dawn hle tih a sawi ve bawk.

Steve Morse hian kum 1994 khan Deep Purple hi a zawm a, a ho hian studio album pariat tichhuak hmanin chung zingah chuan nikuma an tihchhuah 'Turning to Crime' pawh kha a tel. Ritchie Blackmore-a'n band a chhuahsan hnu khan Joe Satriani chuan Deep Purple hi a pui lailawk a, chumi hnuah chuan Morse hian band member nghet ni turin kum 1994 khan Purple hi a zawm a ni. Kum 28 lai album pariat lai tichhuaka, live show eng emaw zat a inlanpui hnuah a nupui damlohna avangin Ian Paice, Roger Glover, Ian Gillan leh Don Airey-te chu a mangṭha a ngai ta a ni.