HSLC Top 10-te'n Maruti Brezza thar an tlangzarh

Mizoram board hnuaia High School Leaving Certicate (HSLC) 2022 exam-a Top 10-a lang mi 14-te chuan Inrinni khan Mizorama hralh chhuah turin car hriat hlawh tak Maruti Brezza an tlangzarh.

Maruti Brezza thar hi Maruti Suzuki Arena showroom, Edenthar, Aizawlah zirlaite hian an khuh hawng. He motor thar hi mi 51 laiin an hauhlawk nghe nghe.

Mizoram dealer GIG Motors chief executive officer John Lalpeka chuan Brezza chu Maruti Suzuki car chhuan zinga mi ni a nih thu a sawi a, HSLC exam-a tiṭhate an chawimawi nan khuh hawngtuah an hmang tih a sawi bawk.

Kum 2016 aṭang khan GIG Motors chuan HSLC exam-a tiṭha, pakhatna aṭanga 10-na chinte chhawmdawlna leh chawimawina turin Rs 12, 000 ṭheuh a pe ṭhin a, tun ṭumah hian Brezza an tlangzarh rualin zirna HSLC exam-a tiṭha mi 14 hnenah Rs 12,000 ṭheuh an hlan nghal a ni.

Maruti Suzuki hian India ramah kum 2016 khan Vitara Brezza car a tichhuak a, he compact SUV hi thla 69 chungin 7,00,000 zet a hralh chhuak hial! Chu chu rawn tuai thar lehin changkang zawkin an rawn duang chhuak a, a hminga Vitara tih chu paihin 'Brezza' tih hming puin engine ṭha leh fuel heh lo zawk turin an rawn duang a ni.

Car chanchin sawitu Pu Lalrawngbawla chuan, "Vitara Brezza-in K15B engine a hman laiin Brezza thar hian petrol heh lo zawk K15C a hmang a, model hmasaah litre khatin km 17 a tlan theih laiin a tharah km 29.15 tlan theia ngaih a ni," tia sawiin a pianhmang inang viau mah se a siam dan a danglam deuh hlawk a, a chhunga chuangte himna ngai pawimawh lehzual a nih thu a sawi.

Maruti Brezza hi Mizoramah chuan Rs 8,57,633 (on-road) man aṭanga inṭanin Rs 14,37,547 man thleng lei tur a awm a, variat 11 lai a awm a ni.