Zuk leh hmuam lamah India a sang

India ram hi khawvel pumah pawh zuk leh hmuam ti nasa ber dawttu ram a ni a, ti nasa ber chu China a ni. India-ah hian Mizoram chu tuma tluk rual lohin zuk leh hmuam ti nasa ber state kan ni.

National Family Health Survey 2015-16-in a tarlan dan chuan India rama zuk leh hmuam ti nasa ber ber state zingah India hmarchhak state parukte kan lang a, chung zingah rau rau pawh Mizoram chu kan chhuanawm hle! Mizoramah kum 15 aṭanga 49 inkar mipa zaa 80.4 leh hmeichhe zingah zaa 59.2 te chuan zuk leh hmuam kan ti. Mipa zinga zuk leh hmuam ti nasa dang state-te chu - Meghalaya (72.2%), Manipur (70.6%), Nagaland (69.4%), Tripura (67.8%) leh Assam (63.9%) te an ni. Hmeichhe zinga zuk leh hmuam ti nasa dang state-te chu Manipur, Tripura, Meghalaya leh Nagaland te an ni.

The Lancet-a 2012 Million Death Study-a tarlan a nih dan chuan India hmarchhakte hi cancer vei tamna a ni. India hmarchhakah mi 1000 zel thi zinga mipa 112 leh hmeichhia 60 te hi cancer vanga thi an ni a, India ram pumah erawh chuan mi 1000 thi zinga mipa 47 leh hmeichhe 44 te chu cancer vang a ni a, national average aiin kan sang zawk hle.

Puducherry chu zuk leh hmuam ti nasa lo ber state an ni a, zaa 14.4%-in zuk leh hmuam an ti a, Punjab chuan dawtin 19.2% an ni. Himachal Pradesh, Daman & Diu, Kerala, Chandigarh and Puducherry-ah te hian hmeichhia, kum 15 - 49 inkar zinga zuk leh hmuam ti chu zaa 1 aia tlem an ni.

Hetihlai hian chanchin ṭha lamah chuan India bikah kum têlin zuk leh hmuam bansan an pung. Thla 12 kalta chhung khan hmeichhia zuk leh hmuam ti za zela 29.3 leh mipaah 30.6% te chuan zuk leh hmuam an chîn ṭhin chu bansan an tum. Kum 2005-2006 aiin tuna National Family Health Survey-in a tihchhuahah hian zuk leh hmuam ti hi za zela chhutin an tlem tawh zawk a, chuti chung chuan khawvel­ah zuk leh hmuam ti tamna ber dawttu kan la ni tho.

Kum 2011 khan zuk leh hmuam tih avanga kum 35 aṭanga kum 69 inkar, damlo inenkawl nana sum hman hi India pawisa chuan cheng tluklehdingawn 1000 chuang (USD tld 22.4) a tling. Heti zat sum hi India ram GDP aṭangin 1.16% a tling a, state sorkar leh sorkar laipuiin healthcare-a a sum hman zawng zawng belhkhawm aiin zaa 12-in a sang zawk.