Metallica-in live video pahnih tichhuak S&M2 August 28-ah
Heavy Metal legend Metallica chuan nikuma Metallica and San Francisco Symphony: S&M2 show an neihna live video pahnih an tichhuak.
An video tlangzarh thar pahnih hi hla thar ni loin 'All Within My Hands' leh 'Nothing Else Matters'-te a ni a, San Francisco Symphony-te nena show an neih hmasaka mi nen pawh a khaikhin theih awm e. Thil chiang tak erawh Metallica hi an kum chu upa tawh mah se rimawi khawvelah an la tar lo a, James Hetfield pawh a hmel enin a kum a tam tawh tih hriat mah se a la zai thei hle a, an live perfomance chu thlira ngaihthlak tlak tak a la ni. Metallica fan-te tan chuan hmaih phal chi a ni lo ang.
S&M2 trailer YouTube-ah en theih
Metallica leh San Francisco Symphony-te hian kum 1999 khan live show an nei ho a, hemi kum 20 tlinna pual hian nikum September 6 leh 8 khan fan 40,000 hmaah show an nei ho leh. Show an neih dun vawi hnihna a nih avang hian S&M2 tia hming vuahin an show live album hi August 28 hian an tlangzarh dawn a, trailer pawh en theih turin YouTube lamah an dah chhuak tawh a, Metallica ngaisangtute mit leh beng a tlai leh dawn tih a chiang.
An live album tihchhuah tur hi digital leh streaming platform hrang hrangah an dah dawn a, heng bakah hian vinyl, CD, DVD leh Blu-Ray edition-te pawh an siam dawn. Super deluxe box copy 500 an siam dawn a, hetah hian concert-naa an hman sheet music, band member-te'n an hming an ziahna chu dahtel a ni dawn bawk.
S&M2 track listing pawh hi an tichhuak tawh a, an hla hit tak tak an sa nual a, chung zingah chuan 'For Whom the Bell Tolls', 'The Unforgiven III', 'One' leh 'Master of Puppets'-te pawh a tel.
Chuai thei lo Metallica
Metallica hi kum 39 liam ta, kum 1981-a indin tawh kha an ni a, James Hetfield leh Lars Ulrich-te din hi niin, Megadeth, Anthrax leh Slayer-te nen hian 'thrash metal big four' tiin an sawi ṭhin. 'Thrash metal big four' zingah hian Metallica hi chu Mizo-te'n kan ngaihthlak nasat ber an ni hial awm e.
Kum 2009 khan Rock and Roll Hall of Fame-ah lakluh an ni a, studio album 10 an tlangzarh tawh bakah live album eng emaw zat an tlangzarh tawh a ni. Chawimawina pawh an dawng hnem tawh hle a, award lian tham dawng turin nomination 146 lai hmu tawhin chung zinga 88 laiah chuan award an dawng. Billboard Music Awards panga lai an dawng tawh a, Grammy phei chu pakua lai an dawng tawh. Nikum thleng khan Kerrang! Award an la dawng zak zak a, Hetfield leh Ulrich-te phei hi chuan mimal ang pawhin chawimawina an dawng hnem tawh hle.