Chance The Rapper Gospel musician nih kher a tum lo
Tunlaia rapper hlawhtling, Kristian ṭha tak, Grammy award pawh dawng hial Chance The Rapper chuan gospel musician nih kher a tum lo a, a music-te erawh Kristian a nih anga Kristian music a nih mai kha tâwk a ti.
Kristian rapper hlawhtling, Billboard 200 chart-ah pawh pakhatna luah thei Chance The Rapper chuan, gospel music tihchhuah a, siam kher a tum lo tih a sawi. Ebony chanchinbuin an kawmnaah, “Gospel thar emaw, Gospel lem siam tuma thawk chhuak ka ni lo. Music ka tihchhuah ve hma, Kristian naupang ka la nih lai aṭanga ka lo ngaihtuah ṭhin, Kristian ka nih anga Kristian music hi a ni zawk,” a ti.
Chance The Rapper chuan music-a a eizawnna chu a hma aia hlawhtling zawk a nih theih nan California a pan a, chumi lai chuan Pathianin a kohna chu a ngaihtuah chhuak leh a, Pathianin amaha a thil tum ahriat chhuah thar lehna chuan tun hnu zela a eizawnnaah nghawng a neiin, amah kaihruaitu a ni.
Music-a hlawhtlinna lian zawk nei tura a chhuah tirh aṭangin gospel music lam a hawi nghal lo a, amaherawhchu amah chu Kristian a nih angin a music chu a Kristian tur a ni tih ngaihtuahna a lo neih tawh chu a tihlawhtling ta zawk a ni.
“Mitin tan Pathian chu engkimah a awm tih hi ka ngaihdan a ni a, an hrethiam emaw, hrethiam lo emaw, an hmu emaw, an zawng emaw pawh nise Pathian chu engkim mai hi a ni,” a ti. Pathian nena an inlaichinna sawi tura tihluihna a awm ṭhin em tih zawhna chu a awm lo tih sawiin, “Pathian chungchang kan sawi theih loh chuan kan zalên lo tihna a ni ang,” a ti.