Third Sovereign leh F. Sanglura ten album an siam

Zo rimawia rock huang chhunga hriat hlawh F. Sanglura leh metal band kan neih ṭhat Third Sove­reign te chuan audio album an siam a, July 10 hian tlangzarh a ni dawn.

Hun eng emaw chen chu an thawm kan hre tawh lo a, an reh vang vang hnuah rock rimawi hmanga Zofate min hrai tlaitu pahnih F. Sanglura leh Third Sovereign te hian album an siam a, an album siam hi ‘Inlar leh la’ tih a ni. July 10 khi F. Sanglura pian champha phak a ni a, hemi niah hian album hi tihchhuah a ni ang. Copy siam tam a ni dawn lo a, copy 100 emaw chauh tihchhuah a ni ang a, signature a awm vek ang.

‘Inlar leh la’ album hi slow rock leh hard rock inpawlh a ni dawn a, F. Sang­lura chuan “Mizo hlaah chuan he album anga hla hi a awm lo ang” a ti a, a album thara ri­mawi siamtu te hi Third So­ve­reign-a Ruben & Ben­ja te an ni a, Vortex record-a siam a ni. Third So­vereign nena album an siam chhan sawiin, “An music play hi ka duh zawng a ni a, kei hi rock/thrash metal lam duh mi ka ni a, kan han sawiho hnuah album siampui min lo châk vezia an sawi a, ka hlate guitar nena sa-in a demo ka pe a, annin a thlûk bo lovin music arrangement an lo siam a, sawi sen a ni lo, ngaihthlak chi a ni,” a ti.

F.Sanglura hian mumal taka album a tih­chhuah hnuhnun ber chu kum 2014-a a ṭhiante nen ‘Chemtatrawta’ tih album an tihchhuah kha a ni. Tuna a album hminga ‘Inlar leh la” tih a hman chhan chu a music arrangement hi fuh a tih vang leh a duhzawng tak a nih vang tih a sawi. He hla hi a ṭhian­pa chanchin aṭanga a siam a ni a, a ṭhianpa hian nula duh deuh mai a nei a, a rim ṭhin a, mahse chu nula chuan midang a neihsan ta daih a, chumi behchhana he hla hi a siamsak a ni.