Maroon 5 bassist a chawl rih dawn

Pop rock band huhang ngah tak Maroon 5 bassist Mickey Madden chuan Maroon 5 a chawlhsan rih dawn tih a sawi.

Mickey Madden hi thla hmasa, June 27 khan tualchhung buaina chhuakah mawh phurtua puh a nih avangin man a ni a, $50,000-a bail a nih avangin chhuah lailawk a ni a, hemi vang hian band pawh hi a chhuahsan nia rin a ni.

Thuchhuah a siamah, "Thil buaipui tur ka neih avangin Maroon 5 chhuahsan rih tur hian thutlukna ka siam a ni. Hemi hun chhung hian ka bandmate-te tan harsatna thlen ka duh lo a, duhsakna sang ber ka hlan bawk," tiin a sawi.

Madden lakah hian California penal code 273.5(a) hnuaiah thubuai ziahluh a ni a, September 29 hian Court-ah a inlan leh a ngai dawn a; thiam loh a chang a nih chuan $6,000 a chawi theih bakah kum ruk lai tan-inah hun a hman a ngai dawn.

Maroon 5 pawhin thuchhuah siamin pawi an tih thu an tarlang ve nghal bawk. Kum 2016 khan Madden hi New York bar-ah cocaine vangin man a lo ni tawh a ni.