Khawvel company lian 2000 zingah China leh US-in ro an rel

Forbes chanchinbuin khawvela public company lian 2000 a thlan chhuah zingah China leh US company-ten sorkarna an chang a ni hawt mai, a lian ber ber top 10-ah heng ram pahnihnaa mi ni lo lang ve chu pakhat chauh a awm.

Forbes-in 2017 Global 2000 a tihchhuaha company lang za zela 40 ngawt hi China leh US company te an ni. Company lian an thlan chhuah danah hian company-in sum a lakluh zawng zawng, a hlep zawng zawng, bungrua leh hmun (asset), leh an company hlutna pumpui (market value) te an chhut a, chuta ṭanga a landan chuan China company, Industrial and Commercial Bank of China (ICBC) chu a hlu ber.

ICBC-in kum khat chhunga a thil hralh chhuah zawng zawng (sale) hi USD tld 151.4 zet a tling a, a hlep chauh hi USD tld 42 zet a ni hem mai. An asset hlutzawng hi USD tld 3,473.2 a ni a, market value hi USD tld 229.8 a ni. An hmunpui hi Beijing a ni a, hnathawktu pawh 461,749 zet an ni. Hlu ber dawttu pawh China-a mi tho, China Construction Bank a ni a, sale hi USD tld 134.2 a ni a, hlep hi USD tld 35, asset hi USD tld 3,016.6 niin, market value hi USD tld 200.5 a ni.

2017 Global 2000 top 10-ah hian US-a mi, Berkshire (an hlep USD tld 24.1), chu pathumna a ni a, US tho, JP Morgan Chase (hlep USD tld 24.2) chu palina, Wells Fargo, US chu pangana a ni. Agriculture Bank of China chu parukna a ni a, Bank of America chu pasarihna, Bank of China chu pariatna, Apple chu pakuana niin, Japan rama mi Toyota Motor chu 10-na a ni.

Top 20-ah US leh China ni lo lang chu Samsung Electronics, South Korea (15-na), leh Royal Dutch Shell, Netherlands (20-na) te an ni. India aṭanga thleng sang ber chu Reliance Industries niin, 106-naah a lang a, an hlêp hi USD tld 4.3 a ni a, top 300 chinah State Bank of India chu 244-naah a lang a, Oil & Natural Gas chu 246-naah, HDFC chu 258-naah, Indian Oil chu 264-naah leh Tata Motors chu 290-naah te an lang. India ram company list-a lang zawng zawng hi 58 lai a ni.