Nick Cannon-a'n ngaihdam a dil

American actor Nick Cannon chuan June 30-a a podcast 'Cannon's Class' tihchhuaha Juda-te huat zawnga a ṭawng chhuah avangin Juda-te hnenah ngaihdam a dil.

Public Enemy member hlui Professor Griff chuan Cannon hi a podcast-ah a kawm a, he inkawmnaah hian Cannon chuan mi dumte chu Hebrai dik tak an nih thu te, Juda nisa tan Juda-te do zawnga chet a theih loh thu te a sawi a, Juda-te chuan Hebrai nihna chu midumte aṭangin an ruksak ni tein a sawi.

Heng a thil sawite avang hian kum 20 vel a lo thawhpui tawh American diversified multinational mass media, ViacomCBS company chuan Cannon hi an thawhpui tawh dawnlo tih an sawi nghal. A thil sawite avang hian Cannon chuan a twitter kaltlangin ngaihdam a dil thu leh inzir a ngaih zia thu a sawi a, ViacomCBS-in an thawhpuina an tihtawp hnuah ngaihdam hi a dil chauh a ni.

Mariah Carey pasal hlui Cannon hi a thusawi avang hian demtu awm mah se tun hma aṭanga a lo thawhpui tawh, Fox Broadcasting Company lam chuan Cannon ngaihdam dilna hi an pawm thu leh a thusawite chu ṭha an tihbik loh thu an tarlang a, an company buatsaih 'The Masked Singer' host tu a la ni chhunzawm dawn tih an sawi bawk.