Diana thih chhanah a car mawhpuh

Kum 1997 August 31 khan thlalatute tlanchhiatsan an tumna lamah Princess Diana chu a bialpa Dodi Fayed nen an chuanna car hmangin France-ah an chesual a, an pahnih hian a thih phah ta a ni. Kha an chetsual dan kha uluk taka chhui reng a ni a, tunhnaia an chhuina an tihchhuah pakhatah chuan an chuan car kha an mawhpuh ber a ni.

Diana te khan an thlenna Paris Ritz Hotel-a pool car, Mercedes-Benz S280 hmangin an chesual a, he motor bik an chhui zuinaah, Mercedes-Benz S280 hi chak taka tlanpui chuan vanduaina bâwm lian tak a ni thei tih an hmuchhuak.

Mercedes-Benz S280 hi a neitu hmasa chu Eric Bousquet a ni a, kum 1994 September thla khan Euro 85,000-in a lei. A lei hnu lawk, kum 1995 khan misual pakhatin a ruksak a, nasa takin a chetsualpui zui. Hemi hnu hian scrap atan a condemn zui a, mahse mechanic ten an siam ṭha a, Etoile Limousines hnenah an hralh ta a ni. He firm hian car hi Paris Ritz Hotel-a an hire theih turin an dah a, chu chu Diana te hian an hmang ta a ni.

A hmaa nasa taka a chetsual tawh avangin Mercedes car hi a rin duap tawh hle a, darkar khatah km 60 aia chaka tlanpui ngam a ni tawh lo niin an sawi a, mahse Diana te khan darkar khata km 100 aia chakin an tlanpui a, an chetsual phah ta a ni. Hetihlai hian Diana bial­pa pa, Mohamed al-Fayed chuan British lal chhungkuain MI6 te hmangin an that niin a ngai thung. Tuna Diana thih dan chungchang sawi chhuak lehtu hi Pascal Rostain a ni a, Paris-a photographer a ni. Ani hian M6 Documentary-ah car ṭhat loh thu hi a sawi chhuak.