San Diego Comic-Con

MCU-in Phase 5 & 6 calendar tichhuak
Kar tawp liam ta chhung khan film siamtute chuan film nghahhlelhawm tak tak trailer an rawn theh chhuak chur chur a ni ber e. Kha kha San Diego Comic-Con vang a ni tih entertainment media lam ngaihventute chuan an hre awm e.

Kum tina neih ṭhin San Diego Comic-Con chu Covid-19 vanga kum hnih lai mumala neih theih a nih tawh loh hnuah kar liam ta Ningani aṭanga Pathianni liam ta thleng khan neih a ni leh ta a, chhimtu pawh nuai chuang tehmeuh an awm leh ta.

MCU dawhkan aṭangin
Marvel Cinematic Universe panel chu mite ngaihven ber zinga mi a ni kum tina, kuminah pawh MCU fan-te tana thu ngaihnawm tak tak tur tam tak an puanchhuak bakah film trailer ngaihven hlawh tak tak turte pawh an pho chhuak leh a ni.

Disney+ Hotstar lama chhuah tur 'I Am Groot' trailer an tichhuak a, hei hi August 10 aṭangin an tichhuak ṭan ang. August-a tihchhuah tur tho 'She Hulk' trailer thar pawh hmuh tur a awm. 'Black Panther: Wakanda Forever' trailer pawh San Diego Comic-Con kaltlang hian an drop bawk a, he film hi November 11 hian tlangzarh an tum bawk.

Marvel boss Kevin Feige chuan 'Black Panther: Wakanda Forever' chu Marvel Phase 4 tawpna tur a nih tawh thu sawiin Marvel Phase 5 a khuh hawng nghal a ni ber a, 'Ant-Man and the Wasp: Quantumania' hmangin Nakkum February 17-ah MCU Phase 5 hi hawn a ni dawn.

Chumi zawhah chuan 'Guardians of the Galaxy Volume 3'-in a zui anga, May 5-ah tlangzarh a ni ang. Captain Marvel chhunzawmna 'The Marvels' Kamala Khan leh Carol Danvers-te intawnna chu July 28, 2023-ah tlangzarh a ni ang a, 'Blade' chu nakkum kum tawp lama tlangzarh tur ni bawkin 'Captain America:New World Order' leh 'Thunderbolts'-te chu kum 2024-a tlangzarh tur Phase 5 film an ni. 'Thunderbolts' hi Phase 5 khartu tur a ni dawn.

MCU Phase 5-ah hian MCU series- Secret Invasion, Echo, Loki Season 2, Iron Heart leh Daredevil Born Again-te pawh an khung tel dawn a, nakkum chhungin heng series-te hi an tichhuak dawn a ni.

MCU Phase 6 sawi ang
Marvel hian an Phase 6 calendar pawh an tichhuak nghal a, chuta film awm ho chu ngaihven loh theih a ni dawn lo. 'Fantsatic Four' chuan Phase 6 hi an rawn pet hawng dawn a, November 8, 2024-ah an tlangzarh ang. Chumi zawhah chuan Avengers film thar pahnih kan hmu dawn bawk. 'Avengers: The Kang Dynasty' chu May 2, 2025-ah an tlangzarh anga, a chhunzawmna 'Avengers: Secret Wars' chu Nov 7, 2025-ah an tlangzarh bawk ang.

Ozzy Osbourne pawh kumin Comic-Con-ah hian inlan a, Patient Number 9 comic book tihlarna turin Zirtawpni khan a inlan a ni

DC Comics lam aṭangin Black Adam, Shazam 2 leh a dangte...
San Diego Comic-Con 2022-ah hian Warner Bros. Panel chuan ngaihven a hlawh viau bawk a, DC fan-te tana thu lawmawm tak tak eng emaw zat an rawn chhawp chhuak nual.

Dwayne Johnson-a channa antihero movie 'Black Adam' trailer chu tun Comic-con-a ngaihven hlawh ber zinga mi a ni. Justice Society-te hmel kan hmuh ṭanna tur film hi October 21-ah tlangzarh a ni dawn. 'Shazam! Fury of the Gods' trailer thar pawh hmuh tur a awm a, he film hi December 21-ah tlangzarh a ni thung ang. Heng film pahnih bak hi chu DC fan-te bengfah viau tur thil an puangzar lo thung. Nakkum lama an tlangzarh tur 'Aquaman and the Lost Kingdom' leh 'The Flash' chungchang engmah hmuh tur a awm lo erawh chuan fan-te a tihrilhhai deuh niin a lang.

Chutichuan...
Game of Thrones prequel series 'House of the Dragon' leh 'Lord of the Rings TV series' panel-te chuan ngaihven a hlawhin bawrtu pawh an tam hle a nih hmel a, trailer an tihchhuah a hit bawka, fan an ngah sa bawk nen, bawrtu an tam pawh hi a mak lo.

Fantasy movie 'Dungeons & Dragons: Honour Among Thieves' panel pawhin ngaihven a hlawh a, Matrix leh John Wick star Keanu Reeves pawh he convention-ah hian a BRZRKR comic book series chungchang sawiin a inlan ve bawk a ni. John Wick 4 chu nakkum March thlaa tlangzarh turin an ruahman a ni.