Zorinzuali Khiangte A rem tawh lo a tih hnuah a ngaidam leh si!

Zorinzuali Khiangte chuan Zoram pum fan chhuakin ‘A rem tawh lo’ a tih hnuah, kum te a vei meuh chuan ‘Ka ngaidam che’ tiin music video thar a rawn tichhuak leh ta.

Album pawh sawi ri ṭan feih feih Zorini hian kumina a music video tihchhuah hmasak ber hi ‘Ka ngaidam che’ tih a ni a, hun a ral chuan thinlung pawh a inthlak ta a niang! ‘Ka ngaidam che’ tih hla hi Michael M. Sailo kutchhuak music hnuhnung ber zinga mi a ni a, Michael-a thih hma lawka an record a ni. He hlaah hian Michael M. Sailo hi a rap lo a, a pangngaiin a zai a, ngaihthlak a tihchakawm lehzual phah hle.

‘Ka ngaidam che’ tih hla hi Lal K. Sailo phuah a ni a, music hi Michael M. Sailo siam niin, RDS Shot chuan video lam an buaipui thung. He hla chauh hi Zorinzuali Khiangtein kumina a khawih tur a ni lo a, hmachhawp eng emaw zat a nei a, chu mai bakah album lam pawh a sawi ri ṭan. “Album siam ka tum a, Michael M. Sailo nen khan kan record nual tawh. Hla dah hnem vak ka tum lo a, uluk leh ṭha theihtawpa music video-te siam ka tum avangin a awm chhun erawh a ṭha hle ang,” a ti.

Tunhnaiah Zorini hian naupang pakhat chu an retheih em avangin fa angin a enkawl. Zorini chuan, “Ka pa hnathawhna hmun aṭangin fa ka adopt a, an chhungkua hi an rethei a, awmna tur mumal pawh a nei lo a, fa angin ka enkawl a ni,” a ti; tunah hian school te pawh an kaltir.

“Pawisaa midang va ṭanpui hi a ṭha viau nachungin kan thei ve tak tak lo a, hetia ka enkawl a, hmalam hun ṭha tak a neih theih nana ka kaihhruai hian ka rawngbawlna ve niin ka ngai a ni,” a ti. A fa lâk hi hmeichhia a ni.