Olivia Rodrigo : SOUR-a hlate mtd. 200 an stream tling vek tawh!

Hla thar tihchhuah a nei lem loa, tour neiin a zinkual deuh reng bawk nen, tunhnaiah thawm lian tham a nei vak lo. Mahse...

Chart data-in Twitter lama an tarlan dan chuan, Olivia Rodrigo album tihchhuah awmchhun 'SOUR'-a hla zawng zawng chu Spotify-ah vawi maktaduai 200 an stream tling vek tawh! Spotify chanchinah, album pakhata hla awm zawng zawng vawi mtd 200 stream tlin vek hi a la awm ngai lo hial! Hei hian Olivia Rodrigo chu 'mi bik' a nihzia a tichiang hle awm e.

Album pakhat chiah a la tichhuak a, rimawi khawvelin a hmelhriat tirh aṭang pawhin kum khat leh a chanve awrh chauh a la liam. Chuti chung chuan a inah Grammy award pathum lai a tarmawi thei tawh.

Instagram lamah pawh hlim taka Grammy Award a hungmawi lai video tawite tunhnaiah a dah chhuak nghe nghe.

'Drivers License' hitmaker hi Time chuan '2021 Entertainer of the Year'-ah a lo puang tawh a, Billboard pawhin 'Woman of the Year 2022'-ah a puang tawh bawk.