'Nope' a hlawhtling
North America Box Office-ah science fiction horror film 'Nope' chuan sum lalut tam berin 'Thor: Love and Thunder' leh 'Minions: The Rise of Gru'-te ai pawhin sum a lalut tam.
Film review-tute fak rawn 'Nope'
'Nope' hi kum 2019-a tlangzarh film lar tak 'Us' director/writer Jordan Peele-a film siam bawk a ni leh a, director a nih bakah script pawh a kut chhuak tho a ni.
Kar tawp liam ta chhung khan theatre 3,785-ah tihchhuah niin $44,366,910 lai sum a lalut a, US pawn lamah tlangzarh la ni lo mah se an film budget $mtd 68 chu a khum thuai dawn niin a lang.
Universal Pictures film thar hi critics lam mit a tlung hle tih a hriat a, a originality bakah Peele-a direct dan hmang chuan fak a hlawhin achangtute chevel pawh an fak viau. Rotten Tomatoes lamah review-tu 246 lai an awm a, chung review hrang hrang aṭang chuan rating 7.4/10 lai a hmu phak a ni.
Pahnihnaah Thor a awm ve a ngai ta
'Thor: Love and Thunder' chuan kar tawp liam ta chhung khan $22,559,278 lai sum lalut leh mah se pakhatna a ni zo tawh loa, sum lalut tam pahnihna a ni. Ram hrang hrang box office aṭanga a sum lakluh tawh zat erawh $598,679,976 lai a ni tawh a, kumina film tlangzarh zinga sum lalut tam pasarihna a ni mek.
'Minions: The Rise of Gru' chu pathumna ni thungin, $18,039,865 a lalut leh a ni.
Film thar tlem azawng
'Nope' bakah hian Box Office Mojo chart-ah film thar tlem azawng lang a awm. 'My Donkey, My Lover & I' (17), 'My Old School' (29) leh 'The Grandmother' (32)-nate chu film thar an ni.
--Top Gun: Maverick-in $tld 1.3 hnaih tawh- Kumina film tlangzarh zinga sum lalut tam ber ni mek hian $tld 1.284 a lalut tawh a, tunkar chhung hian $tld 1.3 a lalut tling hman mai thei niin an sawi---
Box Office top 10:-
1 Nope $44,366,910
2 Thor: Love and Thunder $22,559,278
3 Minions: The Rise of Gru $18,039,865
4 Where the Crawdads Sing $10,358,439
5 Top Gun: Maverick $10,270,995
6 Elvis $6,584,220
7 Paws of Fury: The Legend of Hank $3,872,603
8 The Black Phone $3,508,800
9 Jurassic World Dominion $3,112,045
10 Mrs Harris Goes to Paris $1,407,280