Girls’ Generation 'comeback' studio album Forever 1 thla lehah

May thla laihawlah khan SM Entertainment chuan South Korean girl group lar tak ṭhin Girls’ Generation chu rimawi khawvelah an lo let leh dawn tih an puang tawh a, tunah chuan album thar an tihchhuah hun tur pawh a chiang ta.

Girls’ Generation hian kum 2017 hnua an album tihchhuah leh hmasak ber tur 'Forever 1' chu August 8 hian an tichhuak dawn tih an Twitter account kaltlangin an puangzar.

Kum 4 dawn thawm an neih loh hnuah nikum September thla khan show pakhatah an inlan ho zuai a, chumi hnuah chuan thawm nei lo zui leh vang vangin tunah erawh album thar an tihchhuah dawn thu an rawn tichiang ta a ni.

Girls’ Generation hian kum 2007 khan an hla hmasa ber tichhuakin chumi hnuah chuan lawm an hlawh chho hle a, SKorea mai bakah US leh Japan lamahte pawh an che ṭha ṭhin hle. Asian girl group zinga music video panga, thlirtu maktaduai 100 nei tling thei hmasa ber an ni hial.