DJ Lalvenhimi Minister Lalsawta phuah ngei mai nen

Lengzem huang chhunga hmeichhe zaithiam kan neih ṭhat berte zinga mi DJ Lalvenhimi’n venhim zawh loh a nei a niang, Minister Lalsawta hla phuah ‘Ka tan a chuai’ hla nen a rawn inpho­chhuak.

DJ Lalvenhimi’n kumina a music video hmasa ber ‘Ka tan a chuai’ hla hi Finance Minister Lalsawta phuah a ni a, DJI hian uluk leh theihtawp chhuahin, uluk theihtawpin music video a siam a, music video a siam dan chanchin hi YouTube-ah pawh a dah chhuak nghe nghe. Mizorama music video an siam tawha an la telh ngai miah loh hmanrua nena a siam hi en a, ngaihthlak a chakawm tawh hle.

A hmanrua lam chu enga pawh nise, he hla ‘Ka tan a chuai’ tih hi Michael M. Sailo-a project hnu­hnung ber, an peih hmaa a thihsan tak kha a ni a, a hlu lehzual hle. Mike-a hian peih hman ta lo mah se, a music track hi a nupui, B. Malsawmtluangi chuan a chhunzawm a, hei vang hian a hlu a, SPI pawh a fakawm. Music video siam dan DJI’n YouTube-a a dahah SPI hian hnukulh ṭeuh chunga hma a lak chhunzawm dan a sawi chuan mi a hneh hle.

Chopstyx Restaurant chhunga an shot a ni a, a thawmhnaw hi Remremi Ralte, Millenium Centre-in a tumsak a ni. A music video-ah hian DJI pawh zei takin a lâm a, lâm zirtirtu hi Alan Rinawma, Mizo Dance Camp a ni a, guitar hi Jonah Ralte kutchhuak a ni. Heng mite chungah hian DJI hi a lawm hle.

DJI chuan, “U Mike-a nen khan album pawh siam tuma hma la kan ni a, min thihsan ta mai si a, ka ui hle,” a ti. Engtiangin nge hma a lak chhunzawm ang tih erawh a sawi lo. “Music video ka lo tih­chhuah tawhte min ngaihthlaksak a, min ensak avangin Mizo mipuite chung­ah ka lawm tak meuh meuh a ni,” a ti. DJI hian ama pual liau liau, a official music video pali a tichhuak tawh a, khawhar hla leh mi album-a mi tur a sak leh mi hla an sak te nen chuan music video ṭhahnem tak a tichhuak tawh.