Paris Agreement Chhinchhiah tlak deuh deuhte

Kum 2015 December thla khan khawvela ram hruaitute chu Paris, France-ah inhmukhawmin, khawvel sik leh sa danglam zel leh, khawvel lum tial tial hma­chhawn a, siamṭhat dan tur ruahmanna an siam. Rua­hmanna an siam hi United Nations Framework Convention on Climate Change member ram 195 ten an pawmpui a, chung zinga ram 148 chuan a tihhlawhtlin dan turah an ram bik puala hma an lak dan tur an tichiang tawh a ni.

Hetianga khawvelin inrem tlanna a neih chhoh ṭan mek lai hian khawvela carbon pe chhuak hnem berte zinga mi US chuan inhnuhdawh a tum thu a sawi ta rup mai a, sawisel a hlawhin, US mipuite zingah ngei pawh an sorkar thutlukna duh lotu an tam hle. US a inhnuhdawh chuan carbon pe chhuak hnem, China thutlukna chu a pawimawh a, mi tam tak chuan khawvela US leadership chu tlahniam ṭan leh, China chu US thlaktu ni chho ṭan angin an hmu.

Paris Agreement hian ruahmanna hrang hrang a siam a, a siam zinga pawimawh tak chu khawvel lum belh lam hi pre-industrial level aia 2°C aia sang pelhtir loh a ni. Pre-industrial level tih hi Industrial Revolution hmaa khawvel lum lam chawhrual sawina a ni a, khatih hunlai aia khawvel lum lam hi 2°C aia santir loh hi an tum ber tur a ni. Khawvel lum chhoh dan hi 2°C a pelh leh pelh loh enthlitlai reng a ni ang a, hmalak chhoh dan tur pawh la ngaihtuah chawp zel a ni ang.

Ram 186 zet mai chuan carbon an pek chhuah tihtlem an tum a, tihchhuah tlem a nih theih nana hmalak an tum dan ruahmanna pawh an siam. Paris Agreement hian ram hrang hrangte chu an ruahmanna siam dan tharte thehlut reng turin a phut bawk. Kum 2020 khian carbon pek chhuah dan report pe turin an phut a, chumi hnuah chuan kum nga dan zelah a ni ang. India chuan review cycle hi kum 10 tal ni turin a ngen. Kum 2023 khi chuan ram hrang hrangtena ruahmanna an lo siam leh a taka an tihchhuahte zirchian a ni ang a, chumi aṭang chuan kum nga dan zelah an thlirho tawh ang.

Paris Agreement-ah hian ram ṭhang mekte ngaihhnathiamna tam tak a awm. Carbon pek chhuah chungchangah pawh an ram hmasawnna atana thil tih ngai a la nih avangin hriatthiam an ni a, chutih­rualin carbon pechhuak tlem zawnga hma an lak chhoh tial tial a ngai ang. Ram changkangteah chuan phut a na lehzual. Ram ṭhang mekten green energy an neih theih nan ram changkang­ten sumin an pui bawk dawn a, climate change hmachhawna siam ṭha tur hian ram changkangten sum an thawh ang.