Keith Urban A ropuina hmun chu CMT Music Awards
Country music lama inchawimawina sang, CMT Music Awards chu sem a ni ta a, he hun hi Keith Urban ropuizia tarlan anga ngai an lo awm a nih chuan an ngai ṭhelh lutuk lo a tih theih ang a, Carrie Underwood pawh hmeichhe lamah chuan a duai lohzia lanna hmun a ni a tih theih ang.
CMT Music Awards nomination list tihchhuah a nih khan Keith Urban hi chuti taka langsar fal chu a ni hauh lo. Category paliah a hming a lang a, a ropuina chu heng a lanna zawng zawngah hian winner a ni vek hi a ni. Kum 49 mi zaithiam hi tunlai khawvela country music huang chhungah chuan a neu lo hle tih hi tlang hriat a ni.
Nicole Kidman pasal Keith Urban hian Video of the Year chu “Blue Ain’t Your Color” hla hmangin a la a, he hla hmang vek hian Male Video of the Year a dawng bawk. Carrie Underwood nena an sak dun ‘The Fighter’ chu Collaborative Video of the Year-a puan a ni. Hei bakah hian Social Superstar of the Year-a thlan a ni.
Hmeichhe lamah chuan Carrie Underwood a zai chhung hi chuan country music-ah na na na chuan Underwood kan ti reng mai dawn a nih hmel. Underwood hian award pahnih a la a, Keith Urban nena an sak dun ‘The Fighter’ bakah, ‘Church Bells’ hmangin Female Video of the Year a la.
CMT Music Awards
Video of the Year: Keith Urban, “Blue Ain’t Your Color”
Male Video of the Year: Keith Urban, “Blue Ain’t Your Color”
Female Video of the Year: Carrie Underwood, “Church Bells”
Duo Video of the Year: Florida Georgia Line, “H.O.L.Y.”
Group Video of the Year: Little Big Town, “Better Man”
Collaborative Video of the Year: Keith Urban ft. Carrie Underwood, “The Fighter”
Breakthrough Video of the Year: Lauren Alaina, “Road Less Traveled”
CMT Performance of the Year: Jason Derulo and Luke Bryan, “Want to Want Me” Social Superstar of the Year: Keith Urban