Guns N' Roses leh album thar

An han intuaithar leh a, tour an han nei a le, beisei aiin a ropui a, miin an lo la duh, hei vang hian Guns N’ Roses member-te an phur a, tunah hian album lam pawh sawi rik ṭan a ni.

Guns N’ Roses intuaithar lehah hian Axl Rose, Slash, Duff Mckagan, Ri­chard Fortus, Dizzy Reed, Frank Ferrer, leh Melissa Reese te an tel a, studio album siam tak tak chu la sawi ri chiah lo mah se, member-te rilruah hi chuan a awm ṭan a ang khawp mai. An guitarist Richard Fortus chuan, album siam chu “Zuzi mai mai atan chuan a ṭha mah mah a ni,” a ti. Axl Rose pawh a fak hle a, a bikin hla phuah a thiam a ti.

Guns N’ Roses hian album an ti­chhuak leh a nih chuan kum 2008 hnua an album hmasa ber tur a ni dawn. Kum 2008 khan Chinese Democracy album an tichhuak a nih kha. Han tichhuak ta se, Slash leh Duff McKagan tela kum 20 chuang hnua an album hmasa leh ber tur a ni ang. Slash leh McKagan tela album an tihchhuah hnuhnung ber chu kum 1993 kuma mi, The Spaghetti Incident kha a ni a, hemi album hnu, kum 1996 khan Slash chuan an band a chhuahsan a, kum 1997-ah McKagan chuan a chhuahsan thung.