Ariana Grande a dawihzep lo ; A tour a chhunzawm lehnghal

Manchester Arena-a a concert laia bomb a puah avangin a tawmim a, mahse tunah chuan a rawn tho chhuak leh ta. Ariana Grande hian France aṭang­in a ‘Dangerous Woman’ tour a chhunzawm leh.

Ariana Grande hian Nilaini zan aṭang khan Dangerous Woman tour hi a chhunzawm leh a, Paris khawpuiah a concert a, zanin hian a ngaiah a concert leh ang. Paris-a a concert zawh hnuah Europe hmun dang a pan leh dawn a ni. Paris-ah hian firfiak chetna a awm leh avangin Ariana concert-ah hian security pawh an khauhin an uluk hle.

A concert-na hmun hi AccorHotels Arena a ni a, heta lut turte security te chuan check chikim an check a ni ber mai, mitin mai an dap chhuak vek. Paris police-te chuan khauh leh uluk thei ang berin venhimna an kalpui thu an puang. Ariana hian a tour a chhunzawm bakah ‘Somewhere Over the Rainbow’ hla live-a a record chu Apple Music, Spotify leh Tidal-ah te a dah chhuak leh ta a, he hla aṭanga hlawkna zawng zawng hi ṭanpuina atana pek vek tur a ni.

Dangerous Woman tour hi Ariana Grande album pathumna ‘Dangerous Woman,' nikuma a tihchhuah chawia a neih a ni. Kumin February 3 khan Dangerous Woman tour hi Phoenix, US-ah a ṭan a, entu pawh mi 12,000 vel zet awmin, USD nuai 7 vel zet a lalut nghal. Phoenix hnu aṭang hian North America hmun hrang hrangah concert tour-in a kal kual a, chumi hnuah Europe a lut ta a ni.

European leg-ah hian Sweden khawpui Stockholm chu concert a neihna hmasa ber a ni a, May 8 khan a concert. Hemi hnu hian Oslo, Norway, Herning, Denmark, Birmingham, England leh Dublin, Ireland-ah te a concert leh a, Dublin zawh chiaha a concert-na hi Manchester kha a ni ta a ni. Manchester-a a concert-naa bomb a puah avang khan London, England; Antwerp, Belgium; Lodz, Poland; Frankfurt, Germany leh Zurich, Switzerland-a a concert turte a ṭhulh phah.