Grace ‘Rawngbawl tura chhandam’

Mizo Idol Grace-i chuan kum­inah a music video pahnihna ‘Rawngbawl tura chhandam’ hla chu a tichhuak ta a, he hla hi Kari Jobe hla ‘We are’ lehlin kha a ni. Chart-ah pawh pakhatna lo luah fo tawh Grace-i hla thar hi a nalh a, a music video pawh a ṭha hle. BZA, Blue Waves leh Siama SVP te kutchhuak a ni.

He hla an siam dan vel Grace-i chuan a sawi a, “A hmain Kari Jobe-i’n ‘We are’ a sak hi ka ngaithla fo tawh a, nalh pawh ka ti hle. U Siama [SVP] chuan ‘He hla hi i ngaithla ngai em? Nalh i ti em? tiin min zawt a, nalh ka ti a, ka ngaihthlak fo a ni tih ka hrilh hnu chuan music video-a siam turin hma kan la chho ta nghal a ni,” a ti.

Music video chungchangah “Ka rin aiin a chhuak nalh a, a ṭha ka ti khawp mai. Hâng Lunglên Tlangah te kan shot a, ruah sur lai a ni a, a buaithlak ang reng. Ruah a sur zawhah kan shot chhunzawm lehṭhin a, a hlimawm a, a nuam phian mai,” a ti.

Hun rei tak a training avangin Grace-i hian hla thar a tichhuak tam lutuk lo a, nikum phei kha chuan a reh viau. Kuminah erawh training a zo tawh a, hunawl a nei ta deuh hlek a, music lamah pawh a hma aia nasain a kal thei dawn ta a, a kal ṭan mek. Kuminah pawh music video thar ṭha tak tak kan hmuh belh ngei ang.