Mami Varte Chhangchhe nu a rawn lang dawn!

A vanglaia sumo-ah zawng zawng an play ṭhin, taxi kal velah thlenga an zaitir ṭhin, Zoram dung leh vânga hriat hlawh, MTV lam thlenga inlar tawh Mami Varte hian tunhnai aṭang khan music thar a buaipui leh a, tihchhuah mai theih a ni tawh a, lyrical video-in hma a hruai phawt ang a, chumi hnu lamah music video pangngai pawh beisei ila kan tihsual nasat lutuk a rinawm loh.

Mami Varte chuan, “Pasal ka neih hmaa hla ka lo siam tawh a ni a, ka tichhuak ta lo. Pasal ka neih hnuah hian, chhangchhe nu ka nih hnuah tunah hian ka buaipui chho leh a, recording pawh kan ti ṭha leh vek a ni,” a ti. Mami Varte hi Blue Wave Record label hnuaia mi a ni a, music thar pawh hi Blue Wave Records hnuaiah a tichhuak ang. Mami Varte hla thar tur hi ‘A na chuang e’ tih a ni a, Blue Wave Records neitu BZA chuan peih vek tawh, tihchhuah mai theih tawh a ni tih a sawi.

Music video pangngai taka kan hmuh nghal kan beisei viau nain Mami Varte chuan, “Lyric video-in kan tichhuak chhin phawt ang,” a ti. Lyric video-a an tihchhuah hnuah music video pangngai hi chu an la ruahman turah ngai ila. “Fa pahnih neih tawh a, chhang­chhiat tawh hnuah chuan a tough ve khawp mai,” tiin Mami Varte chuan a sawi. “Hla kawl neuh neuh hi chu ka nei nual a, hla dang pawh ka la ti­chhuak zelin ka ring,” a ti. Blu Wave lam chuan “Hla a nei ṭha khawp mai. Album thlengin kan sawi ri a nia,” a ti bawk.