Wonder Woman Chawlhkar hnihnaah pawh sum a la lalut hnem ber
North America-ah Tom Cruise channa film thar chhuak mah se, Wonder Woman erawh a la tluk thei lo. Wonder Woman film hian kar tawp ni thum chhung khan sum a lalut hnem leh ber.
Tom Cruise channa The Mummy an tichhuak thar a, Wonder Woman erawh a dinna ngaiah a la ding. Gal Gadot channa Wonder Woman hian kar tawp ni thum chhung khan USD mtd 57.2 lai mai a hmuh belh leh. Theatre 4,165 laia an chhuah Wonder Woman film hian North America aṭang chauh pawhin USD mtd 205 lai a lalut tling ta.
Critics tena an sawisel, Tom Cruise channa ni awm lo hial khawpa an ngaih The Mummy chu pahnihnaah a awm a, USD mtd 32.2 a thawk chhuak. North America aiin ram dangah a che ṭha zawk hle a, ram dang aṭang hian USD mtd 141.8 zet a hmu chhuak. Sawisel hlawh viau mah se, North America pawn lama a chet ṭhat avang hian The Mummy hi chhanhimin a awm a, Tom Cruise hminghliau tur a veng hle. Tom Cruise-a channa tawhah chuan khawvel puma chawlhkar khat chhunga sum lalut ṭha ber dawttu a ni tlat. A channa khawvel puma sum lalut ṭha ber chu War of the Worlds kha a ni a, kum 2005 khan chawlhkar khat chhungin USD mtd 167.4 a thawk chhuak thei.
Box office movie
“Wonder Woman” - $mtd 57.2
“The Mummy” - $mtd 32.2
“Captain Underpants: The First Epic Movie” - $mtd 12.3
“Pirates of the Caribbean: Dead Men Tell No Tales” - $mtd 10.7
“Guardians of the Galaxy Vol. 2” - $mtd 6.2
“It Comes at Night” - $mtd 6
“Baywatch” - $mtd 4.6
“Megan Leavey” - $mtd 3.7
“Alien: Covenant” - $mtd 1.8
“Everything, Everything” - $mtd 1.6