Billboard Hot 100-a Harry Styles rorelna a tawp ; Lizzo 'About Damn Time' rorel hun a thleng

Billboard Hot 100 chart-ah kar eng emaw zat chhung Harry Styles chuan a hla hit 'As It Was' hmanga ro a rel hnuah Lizzo chuan 'About Damn Time' hmangin a rawn nek chhuak.

'About Damn Time' hi April 14-ah daih tawh khan Lizzo hian a tichhuak tawh a, a studio album palina 'Special' aṭanga a single tihchhuah hmasak ber niin a vawi khatna atan chart topper a rawn ni a, Hot 100 chart-ah hian kar 14 lai hun hmang tawh thungin kar hmasa lamah khan pahnihna a ni.

Harry Styles 'As It Was' chu pahnihna a ni ve ta thung a, Styles hian he hla hi kar 16 lai chart-ah lanpui tawhin chuta ṭanga kar 10 lai chu pakhatna a nihpui bawk.

Kate Bush 'Running Up That Hill (A Deal With God)' chu kar 28 lai chart-ah lang tawhin tunah chuan top 3-ah a rawn inhlangkai ve ta bawk. Kar hmasa lamah khan palina a ni a, tunah erawh pathumna a ni ta thung.

Billboard 200 chart lamah erawh Bad Bunny 'Un Verano Sin Ti' bawk pakhatna a ni leh a, kar ruk lai chart topper a ni ta der mai.

Lizzo album thar 'Special' chu pahnihna a ni thung a, Harry Styles chuan 'Harry's House' hmangin chart top 3 a khar a ni.