Mizoram Tata Motors dealer NBE-in hmasawn tum

Mizorama Tata Motors dealer National Business Enterprise (NBE), Khatla, Aizawl chuan nasa zawka hmasawn tumin hma an la dawn tih an dealer principal thar Jason Lalzawmpuia (Mama) chuan nimin khan a sawi.

India ramah Tata car-in hma a sawn hle laiin Mizoram dealer NBE chuan kum kal ta lamah harsatna lian tak an tawk a, Covid-19 leng avanga inkhuahkhirhnain a nghawng bawk avangin dealer an nihna tihtawp hial an tum hman. Mahse kumin aṭangin enkawltu thar hnuaiah an intuai thar a, June thla khan Jason Lalzawmpuia (Mama) chuan Dealer Principal nihna chelh ṭanin kumin chhungin hnathawk 20 an lak belh tawh a, Mizo vek an ni nghe nghe.

Mama chuan ,"Sumo, Maxi cab zuartu anga hriat kan la ni reng a, a tam berin passenger car emaw SUV emaw pawh kan zuar a ni tih an la hre lo. Chutih laiin Nexon car lei tawhte hi chuan tha an tihzia an rawn sawi fo mai," tiin a sawi a, hnathawk 54 an chhawr mek thu bakah showroom leh servicing changtlung zawk neih tumin hma an la mek tih a sawi a ni. Lungleiah huang zauh turin hma an la fel thawkhat tawh a, August-ah outlet hawn hman an inbeisei bawk.

Tata Motors hi thla liam ta khan India rama automobile company zingah car hralh tam pathumna niin Maruti-Suzuki leh Hyundai a pha lo a; chutih laiin May khan 43,340 hralhin thla hmasa aiin tlem zawk mah se pahnihna a ni ve thung.

April 2019 khan Mizote hriat lar em em Sumo tihtawp a ni tawh a, Mizoram dealer NBE chuan Tata car changkang leh fak hlawh tak tak tihchhuah chhoh zel a nih avangin Mizote'n Sumo zuartu tia anmahni an hriat dan' pawh a danglam chho ve zel tih an sawi.