Entertainer zinga sum lalut hnem ber Sean ‘Diddy’ Comb

Hip-hop artist zinga sum lalut hnem ber hi Entertainer-ho zingah pawh sum lalut hnem ber a ni a, Sean ‘Diddy’ Comb hi hetiang list-a hausa ber a ni hi a mak lo a, amah nen a inhmeh hle tawh zawk.

Diddy hian thla 12 chhung­in USD mtd 130 zet a lalut a, entertainer-ho zinga sum lalut hnem ber a ni. A sum lakluhna lian ṭhenkhat chu kan hriat tawh, Diageo Ciroc vodka te, Bad Boy Family Re­union tour te a ni. Hei bakah a sum hmuhna lian, tun thla 12 chhung bika mi chu Sean John clothing line a hralhna a ni. Sean John Clothing line-a share hmun thuma ṭhen hmun khat a hralh a, a hralhna zat hi USD mtd 70 vel a ni.

Sum lalut hnem pahnihna chu tudang ni loin Beyonce a ni a, thla 12 chhung khan USD mtd 105 lai a hlawh chhuak. Heti zat a hlawh chhuah theihna lian tak chu Formation World Tour kha a ni a, chu bakah chuan a album hit zet mai ‘Lemonade’ hralhna kha a ni bawk.

Sum lalut hnem pathumna hi musician a ni lo a, tudang ni loin ziaktu lar JK Rowling a ni. Harry Potter aṭanga khawvelin a hriat lar hian USD mtd 95 a lalut a, a dawt leh chu Drake niin, USD mtd 94 a lalut. Sum lalut hnem pangana hi footballer hlawhtling Cristiano Ronaldo a ni a, thla 12 chhungin USD mtd 93 a lalut.

Entertainer sum lalut hnem 10-ah The Weeknd chuan USD mtd 92 lalutin parukna a ni a, Howard Stern chuan USD mtd 90 a lalut a, Coldplay-in USD mtd 88, James Patterson chuan USD mtd 87 leh LeBron James-a’n USD mtd 86 lalutin, top 10-ah an lang.