Ngaihzawng tur leh pasal tur a dang Cameron Diaz

Actress chhe lo ṭhin kha big screen-a a lan mang loh tak hnuah tunhnaiah media hmaah a rawn pên chhuak leh a, a chanchin a rawn sawi. A rawn sawi lansarh ber pakhat chu ngaihzawng leh pasal tur a dang tih hi a ni.

Kum 44 mi a ni tawh a, kum 41 a nihin pasal a nei chauh. Cameron Diaz hian ngaihzawng a hmu lo a ni lo a, ngaihzawng a hmu ṭeuh a, a ngaihzawngte pawh Hollywood-a hming langsar ber ber an ni. Mahse pasal a neih har chhan a sawi a, “Pasal leh ngaihzawng hi a inang lo nasa hle a ni,” a ti.

Justin Timberlake nen an lo inngaizawng tawh a, Jared Leto leh Alex Rodriguez te pawh an a lo ngaizawng tawh bawk. A pasal ni ta erawh chu Benji Madden a ni a, kum 2015 khan an innei. Pasal a neih har chhan an zawt a, “Pasal tur tak ka la hmuh loh vang a ni ber; a hma chuan ngaihzawngte chu kan lo nei ve ṭhêm ṭhûm vek a...” a ti. “Ngaihzawng leh pasal hi a inang lo nasa mai. Tunah chuan pasal ka nei a, ka pasal hi ka nun leh kawng engkima ka partner a ni,” a ti. Cameron hian Benji nen hian ngaihhlut zawng engkim a inang a, kawng engkim­ah an intluk hle niin a sawi bawk.

Kum 2014-a ‘Annie’ a chan hnu khan big screen lamah Diaz hi kan hmu ta mang lo. Hetianga film lama a lan tak lohna chhan hi a sawi a, “Tunge ka nih chiah’ hi ka hre lo ṭhin. Chu chu ka nitin nuna ka hmachhawn thil buaithlak tak a ni,” a ti. Mahni nihna pawh inhre lo chunga nun hman chuan harsatna tam tak a siam ṭhin niin a hria a, amaha amah hrechiang turin a hun a hmang a, chuvang chuan film lamah kan hmu ta mang lo a ni.