Jio Miss Popular atan Rody ; A la vote theih zel

Jio Miss Popular hi June 2 aṭang khan hawn a ni a, June 19 zan dar 11.59 thleng a vote theih dawn. JioChat hmang tan JioChat aṭanga vote tur a ni a, a hmang ve lote tan https://content.jiochat.com/ji... Facebook account hmanga inziak lutin a vote theih. Mi pakhat tan ni khatah vawi khat chauh zel vote theih a ni a, ni hranah erawh a vote nawn theih thung. Nitin vawi khat a vote theih tihna a ni. Heta vote hmu hnem chu Jio Miss Popular-a puan tur an ni a, chuvang chuan contestant te tan pawn ṭan a na hle a, Rody chuan Mizo mipuite theihtawpa amah ṭawiawm a, ṭanpui turin a ngen.

Fbb Femina Miss India final atana inbuatsaihna a kal chho zel a, Glam Resort Wear shoot an nei tawh a, he shoot hi Rajasthali Resort & Spa Jaipur hmuna neih a ni a, hemi hmunah vek hian Glam Next Door Shoot an nei bawk. Alesia Raut hoin Ram Walk Session an nei.

Kuminah hian kum danga an tih ngai lohin modern Indian couture hmangin an inchei dawn. Kum dangah chuan western silhouette hman a ni ṭhin a, kuminah erawh chuan Indian zawkin kalpui a ni ang.

Miss India hi Jaipur, Rajasthan-ah daih an awm a, hei hi Fbb Femina Miss India leh Rajasthan Tourism ten tun ṭum bik atana thawhdunna an siam vang a ni. Miss India contestant te hi Rajasthali Resort & Spa, Jaipur-ah an innghat a, he hmunah hian grooming leh training te pawh neih nghal vek a ni.