Beyonce-i'n 'Renaissance' a tlangzarh ta

Beyonce chuan nimin khan a studio album pasarihna 'Renaissance' chu Columbia Records leh Parkwood Entertainment kaltlangin a tlangzarh ta a, streaming platform hrang hrangah ngaihthlak theihin a awm tawh.

Nimina a album tlangzarh hi Beyonce chuan 'Act I: Renaissance' a ti deuh kher a, hla 16 awmin Beam bakah Grace Jones leh Tems a thawhpuina hlate pawh he album-ah hian a awm a ni.

He album-a hla phuahtu leh produce-tu zingah hian a pasal Jay-Z bakah Drake, Skrillex, The-Dream, Syd, Lucky Daye, Donna Summer, Giorgio Moroder, Nile Rodgers, Nija Charles leh 070 Shake-te hming pawh a lang a, kum 2016-a 'Lemonade' a tihchhuah hnua studio album a tihchhuah leh hmasak ber a ni a, a fan-te pawhin an hlut viau ang tih a rinawm.

Album review ṭhinte pawhin Beyonce album hi an fak angreng hle a, The Daily Telegraph leh The Guardian chuan five star-ah four star an pe ve ve a, The Line of Best Fit chuan 9/10 rating a pe hial bawk.

"Act pathum awmna project hi hripui len laia kum thum chhunga record a ni. A reh duk hunlai ni mah se kei chuan hun 'creative' ber hun ka tawng thung.

"He album ka siam vang khan khawvelin hun hlauhawm tak a tawn lai pawh khan ka duhthusam ramah chengin tawmbona ka neih phah a ni," tin a album thar chu a ngaihhlut thu a sawi.

Kum 40 lai ni ve tawh Beyonce album thar hi dance, hip hop bakah R&B lamhawi a ni a, June 20-a a tihchhuah, Billboard Hot 100 chart-ah pawh pasarihna lai a nihpui, 'Break My Soul' pawh kha he album-ah hian a tel a ni.

'Renaissance'-a hla awmte:-
1. "I'm That Girl"
2. "Cozy"
3. "Alien Superstar"
4. "Cuff It"
5. "Energy" (featuring Beam)
6. "Break My Soul"
7. "Church Girl"
8. "Plastic off the Sofa"
9. "Virgo's Groove"
10. "Move" (featuring Grace Jones and Tems)
11. "Heated"
12. "Thique"
13. "All Up in Your Mind"
14. "America Has a Problem"
15. "Pure/Honey"
16. "Summer Renaissance"