Malaysia-ah 'Thor: Love and Thunder' tlangzarh dawn lo

Malaysian theater operator Golden Screen Cinemas chuan an ramah 'Thor: Love and Thunder' tlangzarh a nih dawn loh thu a puang.

Kar hnih vel liam taah khan 'Thor: Love and Thunder' hi Malaysia-ah chuan tiam chin awm loa tlangzarh hun sawn hlat a nih thu puanzar a lo ni tawh a, tunah erawh thuchhuah thar Golden Screen Cinemas chuan siam lehin,"Customer hlu takte u, Disney chuan Marvel Studios’ Thor Love and Thunder’ chu Malaysia-ah tlangzarh a ni dawn lo tih an sawi a ni," tiin an tarlang.

June thla khan Malaysia ramah hian 'Lightyear' tlangzarh tur ṭhulh a lo ni tawh bawk a, mahni anpui inkawpna lamhawi lanna awm chu an ram censorship thuneitu lamin paih tura an duh, film siamtu lamin an remtih loh vangin tlangzarh tur hi an ṭhulh a ni. Malaysia hi Muslim tamna ram niin homosexual lamhawi tihlanna film duh lotu ram an ni.

'Thor: Love and Thunder' hi US-ah chuan July 8 khan tlangzarh a ni tawh a, ram dang eng emaw zatah tlangzarh tawh bawkin $maktaduai 607.9 lai a hmu chhuak tawh a; kumina film tlangzarh zinga sum lalut tam pasarihna a ni der tawh bawk.