Aquaman and the Lost Kingdom-ah Ben Affleck Batman!

Ben Affleck-a Batman chu DCEU-ah kan hmu tawh dawn lo emaw kan tih laiin Jason Momoa chuan Instagram kaltlangin 'Aquaman and the Lost Kingdom'-ah kan hmu leh dawn tih a sawi.

Momoa hian Affleck nena an thlalak dun chu IG-ah post-in a caption-ah Aquaman 2-ah Affleck 'Batman' a inlan ve leh dawn thu hi a tarlang a, a IG Story lamah pawh Ben Affleck a inlan leh dawn thu hi a sawilang bawk a ni.

Hei bak hi chu thuchiang dang erawh puanzar a la ni loa, Ben Affleck chu eng ang chiahin nge a inlan dawn tih pawh puanzar a la ni lo.

'Aquaman and the Lost Kingdom' hi James Wan bawkin direct lehin nakkum March thlaah tlangzarh an tum a, Amber Heard, Willem Dafoe, Patrick Wilson leh Nicole Kidman-te pawh an inlan leh dawn a ni.

Aquaman film hmasa kha kum 2018-a tlangzarh niin a hlawhtling rem rem hle a, $maktaduai 200 vel sengin an sum lakluh erawh $tluklehdingawn 1.14 lai a tling.