Hrilen hnua animated film hlawhtling ber 'Minions: The Rise Of Gru'

'Minions: The Rise of Gru' chuan US tualchhung Box Office aṭangin $maktaduai 300.9 a hmu chhuak tawh a, hripui len hnua US tualchhung Box Office aṭanga hetiang zat sum hmuchhuak leh thei hmasa ber a ni hial.

Kum 2019-a Frozen 2 tlangzarh a nih hnuah khan US tualchhung Box Office aṭanga $mtd 300 lalut tling thei animated film an la awm leh loa, mahse 'Minions: The Rise of Gru' chuan chu thawnthu chu an rawn her danglam ta a ni.

He film hi $mtd 80 vel senga an siam niin khawvel pum huap ang pawhin Covid-19 hrilen hnua animated film hlawhtling ber a ni a, July 1-a an tlangzarh kha niin ram hrang hrang Box Office aṭanga a sum lakluh belhkhawm phei chu $mtd 656.9 lai a ni tawh.