KEIMAHNI, Season 2 an sawi ri!

Mizo sitcom hmasa ber KEIMAHNI chu Season 1 tihchhuah a ni ta a, tunah hian Season 2 an siam leh dawn nia sawi thawm a awm mek.

Lily Darnei, Muansangpuii, Maruata Rawite, Hriatpuia Kion leh Faka Hnamte-te channa KEIMAHNI hi Remna Ni khan tlangzarh a ni a, he fiamthu show hian hlut a hlawhin Rumawi App kaltlanga entur pawh an ṭhehnem hle tih a chiang. Chumi a nih avang chuan Season 2 beiseitu pawh an awm nual ang tih a rinawm.

He film/serial buatsaihtu Jeronimo! Production lam chuan thutlukna siam harsa an la ti hle thung a, "Mi tam takin min hlutsak ve a ni tih kan hriat hian kan lawm a, mi chhungkuaa hlimna thlentu nih hi kan châk ber a ni. Chutih rual chuan season dang hi kan buatsaih leh thei ang em? tih zawhna hi chu chhân a harsa hrih khawp mai.

"Kan shoot-na hmun pui ber, U Mapuii In kha Govt Champhai Primary School-2 a ni a, Pandemic laia hna thawk kan nih avangin thil a awlsam a, mahse tunah naupang school an lut leh tawh a, Hall kha school neitute lamin thildangah an hmang ve duh bawk si a, hei ringawt pawh hian harsatna min thlen mai thei. Tin, Lily hi Shillong-ah college a kal mek bawk a, an chawlh remchân lai chân a ngai bawk ang. Amaherawhchu, mipui lam aṭanga nawrna a nasat viau chuan kan chhunzawm leh mai turah kan inngai," tiin Jeronimo! Production neitu Jerome Hauzel chuan Season 2 siam leh chu hautak viau dawn mahse siam leh tura an inhawn thu a sawi.

Jerome Hauzel chuan an show chungchang chu sawi chhunzawmin,"1-5 kha aite chhinna ang deuh a ni a, a changtute leh a crew lam pawh, zep loah chuan kan la bo deuh a, amaherawhchu 6-10 chinah kha chuan kan zavaiin kan tih tur kan chiang tlâng tawh a, a hmuhnawm tawh khawp mai," tiin a nau te hmasawnna chu a fak hle.

KEIMAHNI hi June 30 khan Episode 1-5 release a ni a, July 15 khan 6-10 an release leh bawk. La en lo tan RUNMAWI App-ah lei theihin a awm reng a ni.