Christian Music News ; We The Kingdom-in hla thar tichhuak Album thar tlangzarh hun tur tichiang

American contemporary Christian music band 'We The Kingdom' chuan Zirtawpni liam ta khan hla thar 'Left It In The Water' tichhuakin September 16-ah album thar an tihchhuah dawn thu an sawi bawk.

An album thar tihchhuah tur hi an studio album pahnihna ni turin an band hming chawiin 'We The Kingdom' an ti dawn. Fox & Friends’ All-American Summer Concert Series-a an inlannaah an album thar tur chungchang hi an sawi chhuak a, hla 13 a awm dawn tih leh pre-order theih a nih tawh thu an sawi bawk.

Rock, country leh Gospel genre inpawlh a ni dawn a, an member Ed Cash chenna ina an phuah leh record vek niin Capitol Christian Music Group kaltlangin an tlangzarh dawn a ni.

Grammy award nominee vawi hnih lai ni tawh We The Kingdom hian May thla tawpah khan an album thar tur 'We The Kingdom' aṭanga an single hmasa ber 'Miracle Power' chu an lo tichhuak tawh a, Zitawpnia an tlangzarh 'Left It In The Water' pawh kha an album tharah hian a tel dawn bawk.

We The Kingdom hi Christian band la naupang tak niin kum 2019 khan an hla hmasa ber leh an album hmasa ber an la tichhuak chauh a, chuti chung chuan Christian rimawi ngainatute zingah erawh an rimawi a mikhual lo hle. GMA Dove Awards phei chu pathum lai an dawng tawh a, an album hmasa ber 'Holy Water; chu Billboard Music Award-ah nominee ni tawhin Grammy Awards-ah phei chuan category pahnih laiah nominee an ni tawh bawk.

‘We The Kingdom’-a hla awm turte:
1. Left It in the Water
2. Mine
3. Jesus Does^
4. God is on the Throne+
5. Deep End
6. Miracle Power
7. Tabernacle
8. Life is Good
9. Count the Stars (Be There for You)
10. If I Gave You My Heart
11. The Veil
12. Family
13. Left It In the Water (Edit)