Gal Gadot Wonder Woman a chan laiin a rai

Kum 1985-a piang, Gal Gadot-Varsano hian tunhnaia an kawmnaah Wonder Woman an chan lai khan nau thla nga mi a pai tih a sawi a, mahse a film kha han en teh, nau pai lo nula tam takin an tluk lohzia kha! Gal Gadot hian a fa pahnihna a pai laiin Wonder Woman film an chang tih a sawi a, an chan ṭan chhoh lai khan thla nga mi a ni tawh. March thla khan naute hi a hring.

Gal Gadot hi Israel mi a ni a, blockbuster movie vela kan hmuh hma hian Israel sipaiah a lo ṭang ve rân tawh a ni. Israel mi a nih avangin sipaia ṭan hi a tih ngei ngei a ngai a, chuvang chuan kum 20 mi a nihin Israeli defence force lamah a lut ve ta a ni. A hming hi Hebrai ṭawng a ni a, Gal tih hi ‘tuifawn/ fâwn’ tihna a ni a, a surname hi ‘Luipui kam’ tihna mai a ni. Petah Tikvah khuaa piang a ni a, he khaw hming put chhan hi Hosea 2:15 thua Beiseina Kawngka tih kha a ni. A pi leh pu te hi German Nazi hnuaia tihduhdah tuar damchhuak an ni. Kum hnih chhung Israel sipaia aṭan lai hian combat trainer a ni ṭhin a, chuvang chuan insual vel chu a hmel en ai hian a ti thei viau ang.

A pian a nalh a, a chhe lo bawk si, a inkhaithlai zaih mai. Ft. 5 leh inchi 10 laia sang a ni a, kum 2004 khan Miss Israel-a thlan a lo ni tawh a, kum 2004 kum vek hian Ecuador-a Miss Universe thlannaah khan Israel ram ai a lo awh tawh a ni. Kum 2008 aṭang khan lemchan khawvelah a lut ṭan a, a channa hmasa hi Israeli drama Bubot a ni. Fast and Furious-ah khan a chang leh a, khata ṭang khan khawvelin a star ṭan. The Fast and The Furious-ah pawh a chang zui leh bawk.

James Bond film pawh hi a chan châk zinga mi a ni. Quantum of Solace an siam dawn khan, a changtu tur audition an neihah pawh Gal Gadot hi a inlan a, mahse Olga Kurylenko an thlang ta zawk a ni. Fast and Furious pangana leh paruknaah a chang a, khang film-ah khan stunt pawh aman a ti vek! Kum 2009-a Fast & Furious, kum 2011-a Fast Five, kum 2015-a Furious 7-ah te khan a chang a, Batman v Superman: Dawn of Justice-ah khan Wonder Woman lemah a chang tawh bawk.