Top 100 Artist-ah Halsey pakhatna

Billboard 200 chart-a a album pakhatna a nih hnuah amah pawhin dinhmun sang a chang chho a, Billboard Top 100 Artist-ah a vawi khat nan Halsey chu pakhatna a ni.

Halsey hian a album ‘Hopeless Fountain Kingdom’ album a tichhuak a, Billboard 200 chart-ah pakhatna a luah. He album a hralhṭhat avang hian Billboard Artist 100-ah pakhatnaah a rawn kai. A hmain he chart-ah hian Halsey hi 21 a ni.

Billboard Artist 100 chart hi kum 2014 July thla aṭang khan Billboard hian a siam a, he chart atana tehna pawimawh chu an music leh album, an track thlengin hralh hnem danah te, radio-a an play nasat te, streaming leh social media thlenga an hlawhtlinna aṭanga teh a ni.

Artist 100 chart-ah hian Ed Sheeran chu pa­hnihnaah a chho a, Bruno Mars chu pathumnaah a chhuk thung. Kendrick Lamar chu palinaah a tla thla a, Justin Bieber chu panganaah a rawn kai.