U2 tour a hlawhtling nghal

The Joshua Tree album hi kum 1987 March thlaa an tihchhuah kha a ni a, he album-in kum 30 a tlin lawmna pual hian U2 chuan tour hi an nei a ni. Show vawi 10 chauh an la nei chungin a hlawhtling nghal hle a, Billboard-in tour hlawhtling a tehna, Hot Tours-ah pakhatna an luah nghal.

Tour an neih tur atana ticket an zawrh chhuah reng rengte hralh zawh nghal vek zel a ni a, stadium pariatah show vawi 10 an nei tawh a, henga entu zawng zawng hi mi 519,648 an tling. Tour hi May 12 khan Vancouver, Canada aṭangin bul an ṭan a, he hmunah hian entu 45,436 zet an awm.

Show an neih tawh chinah Rose Bowl, Pasadena, California-a an show neih a hlawhtling lehzual rem rem hle. May 20 leh 21 te khan he hmunah hian show an nei a, ticket an hralhna aṭanga sum an hmuh zawng zawng hi USD mtd 15.7 zet a tling a, show vawi hnih an neiha entu zawng zawng hi mi 123,164 zet an ni. Chicago-a Soldier Field-a an concert pawh a turu hle tho. He hmunah hian show vawi hnih tho an nei a, June 3 leh 4 khan a ni. Ticket hralhna aṭangin USD mtd 13.4 zet an lalut a, ticket hi 105,078 an hralh.

Billboard Hot Tour-ah hian Tim McGraw leh Faith Hill te tour chu pahnihna a ni pha. May aṭanga June 7 chhunga show an neih tawh chin, show vawi 15-ah USD mtd 16 zet an lalut. Iron Maiden tour chu pathumna niin, May 4 aṭanga May 28 chhunga show vawi 12 an neihah USD mtd 10.5 an hmu tling.