‘Imagine’ phuahtu Yoko Ono

John Lennon-a thihsan tak a nupui, Yoko Ono chu ‘Imagine’ hla phuahtu, songwriting credit pek a ni dawn.

Hla nalh leh chuai thei lo tura ngaih ‘Ima­gine’ hla phuahtu nihna hi Yoko Ono hnenah pek/hlan a nih tur thu Nilaini khan National Publishers Association, New York tana event buatsaihah puan chhuah a ni. National Publishers Association-a an CEO, David Israelite chuan credit pek tur chu Ono a nihzia John Lennon-a’n a sawi lai audio a play nghe nghe. 'Imagine' hla phuah a nih theihna chhan bulpui pakhat chu Yoko Ono hi a ni.

New York-a event buatsaihah hian Yoko Ono, tunah chuan kum 84 mi lai ni tawh hi a fapa, Lennon nena an fa, Sean Lennon nen an kal dun. He hunah hian National Publishers Association chuan Imagine hla hi Centennial Song-ah an thlang a, lawmman pawh an dawntir. ‘Imagine’ hla hi kum 1971-a tihchhuah kha a ni a, a hlawhtling hle. Recording Industry Association of America-in 365 Songs of the Century a thlan chhuahah 30-naah a lang pha a, Rolling Stone chanchinbuin “The 500 Greatest Songs of All Time” a thlan chhuahah pathumna a ni. Guinness World Records British Hit Singles Book-ah chuan hla mal ṭha ber dawttu angin a tarlang.