Zualbawihi album pathumna tur Lai hla hlang a hnai

Mizorama zaithiamten digital age-a kan lut an tuar a, piracy avang­a album an tihchhuah ṭhat duh tawh meuh loh laiin, Zualbawihi chuan a huaisenna a chhuah leh a, a album pathumna tur a peih a, a tlangzarh hun tur nen a ruahman.

Zualbawihi hian a music video album pahnihna a tihchhuah dawn khan “Documentary atan hrim hrim pawn album hi ka la tichhuak zel ang,” a tih chu a takin a chantir a, a music video album pathumna tur a peih fel a, July 5 hian tlangzarh turin a inruahman. Zualbawihi album pathumna tur hi a album dangte ang lo takin, Halkha (Lai) hlang a ni dawn.

Lusei ṭawng hla awm lohna Zualbawihi album pathumna tur hi Mizo hnam inpumkhatna tur zawng chuan album hlu tak a ni dawn. July 5, khian I&PR Auditorium-ah Ngunlianchunga, minister chuan a tlangzarh ang a, C. Dinthang, Lelte Weekly editor chu MC a ni ang.

Album-ah hian hla 14 a awm dawn a, hla phuah thiam, fam ta, Dokamlova hla thluk siam vek an ni ang. Hla thu erawh hi he album sponsor-tu, Australia-a awm mek, Thangve phuah a ni. Thangve chuan, “Zofate khawvel ram hrang hrangah awm mah ila, unau kan ni a, inhmangaih tawn tur kan ni. Chuvang chuan kan inpumkhatna a zual zel theih nan, kan unau dangte hla hi thiam ve ṭha ka ti a, min duhsaktute ngenna angin he album Lai hla hi kan lo buatsaih ta a ni” a ti.

Zualbawihi hian zai lamah ṭan ala nasa hle a, BA result nghak mek anih vangin zirnain a tibuai vak tawh lo bawk a, You tube lamah pawh hma a sawn hle. YouTube-ah hian ama pual channel bik te pawh a nei fel ta. Amah ngainatu zawng zawng ten he Youtube channel hi lo subscibe ve hram turin a ngen a, a channel-ah hian a video thar ṭha tak tak lo tihchhuah zel a tum.